.jpg)
”Altı həftəyə hesablanmış periodda altı-yeddi sınaq matçı keçirməyi arzulayırıq”.
Bu sözləri Sportinfo.az-a açıqlamasında ”Qəbələ”nin baş məşqçisi Kaxaber Sxadadze deyib.
Bir ildən sonra Premyer Liqaya qayıdan “qırmızı-qaralar”ın yay hazırlıq planı bəlli olub.
Komanda iyunun 30-da Qəbələdə hazırlıqlara başlayacaq. Toplanışın ilk mərhələsi 14 gün davam edəcək.
Bu müddət ərzində 2 yoxlama oyunu planlaşdırılıb. Hazırlıq matçları iyulun 6-sı və 14-ü baş tutacaq. İkinci yoxlama oyunu “Şamaxı”ya qarşı keçiriləcək.
Təlim məşq toplanışının ikinci mərhələsinə iyulun 14-də start veriləcək.
Avqustun 8-dək Qəbələdə davam edəcək hazırlıq dövründə daha 5 oyun keçirilməsi planlaşdırılır. Rəqiblər və matçların vaxtı barədə məlumat veriləcək.
Gürcüstanlı mütəxəssis yay hazırlıq planı ilə bağlı dəftərçəsindəki qeydlərdən danışıb:
“İlk iki həftə Qəbələdə hazırlaşacağıq. Bu, 100 faiz dəqiqləşib.
Daha sonra 15-16 günlük ölkə xaricinə yollanmağı düşünürdük. Hansı ki, orada keyfiyyətli rəqiblərlə yoldaşlıq görüşləri keçirməyimiz mümkün olacaqdı.
Uyğun yer tapmaq, viza məsələlərini həll etmək - bunlar əlavə çətinliklər yaratdığından, Azərbaycandan kənara çıxa bilmədik“.
