“Lion”nun təhlükəsizlik şöbəsinin rəhbəri Enni Saladin Avropa Liqasının 1/4 final mərhələsinin “Beşiktaş”a qarşı ilk oyunda baş verən hadisələrlə bağlı açıqlama verib. Sportinfo.az xəbər verir ki, Saladin və klubun vitse-prezidenti Vinsent Ponsot məsələylə bağlı mətbuat konfransı təşkil ediblər.
Azarkeşlər arasında qarşıdurmaya görə matç 45 dəqiqə gec başlayıb. Saladin baş vermiş hadisədə türk azarkeşləri günahlandırıb: “Bizim də öhdəliklərimiz var idi. Bunun fərqindəydik. Ancaq bariz bir şəkildə görünür ki, aqressiv türk xuliqanların qurbanı olduq. Görüntülər ortadadı. UEFA nümayəndələri də hadisənin şahidi oldu. Hər klub öz azarkeşlərinə cavabdehdi.
“Çarşı” azarkeş qrupuna məxsus çox sayda xuliqan var idi. Bütün çaxnaşmalara səbəb olan, matçın 45 dəqiqə gec başlamasının günahkarı da məhz onlar idi. Onlar hər yerdəydilər, nəzarət etmək mümkün deyildi. Yandırıcı maddələrdən istifadə etmək istəyən hamı orda idi. Hadisələr bu sahədə təcrübəsi olan şəxslər tərəfindən həyata keçirildi. Ancaq bura gələn azarkeşlər özlərinə hakim olmalıydılar, bunu onlar da bilirdilər”.
