"Qarabağ"ın yarımmüdafiəçisi Riçard Almeyda Avropa Liqasının qrup mərhələsinin APOEL-lə ev oyunundan (2:2) sonra Sportinfo.az-ın əməkdaşının suallarını cavablandırıb.

- Əvvəlcə oyunla bağlı fikirlərinizi bilmək maraqlı olar...

- Fikirlərim pozitivdir. Həftə ərzində məşqlərdə nə etmişdiksə, onları reallaşdırmağa çalışdıq. Məğlub olanda da, heç-heçə edəndə, qalib gələndə də bunu hamılıqla edirik. Futbolda səhvlər qaçılmazdır. Bu gün çox yaxşı oynadıq. Kifayət qədər qol epizodları yaratdıq. Səfərdə qələbə qazanmaq üçün ən azı 3 dəfə yaxşı oynamaq lazımdır.

- Bu gün "Qarabağ"ın heyətində meydanda ən yaxşılardan biri idiz Sanki ikinci nəfəslə oynayırdız...

- Yaş sadəcə kağız üzərindədir. Əgər düzgün qidalanırsansa, qorunursansa, peşəkar futbolçuya xas olan bütün işləri görürsənsə, üstəlik, mükəmməl ailən də varsa, yaş elə də önəmli deyil.

- Sizcə, nəticə oyuna görə oldu?

- Mən də sizdən soruşmaq istəyirəm. Sizcə, ədalətlidir?

- Dünən APOEL-in baş məşqçisi Tomas Doll demişdi ki, oyundan sonra gülən tərəf APOEL olacaq. Necə düşünürsüz, rəqib buradan gülə-gülə gedir, yoxsa təəssüf hissi ilə?

- Məncə, gülərək getmədilər. Amma 1 xal da qənimət sayıla bilər. Başımızı yuxarı qaldırmalı və bundan daha yaxşı oynamalıyıq ki, cavab matçında da xal qazanaq. Qarşıda "Səbail"lə çempionat oyunumuz da var.

- Çempionatda söz düşmüşkən, bu gün 30 min, 3 gün sonra isə 300 azarkein qarşısında oynamaq necə təsir edir?

- Fərq eləmir. Əgər meydana çıxırsansa, azarkeşin sayı elə də önəmli deyil. "Qarabağ" olaraq, yalnız qələbə haqda düşünmüşük. Bunun sayəsində hazırkı səviyyəyə çatmışıq. Bundan sonra da belə olacaq.