"Yeni mövsümdə daha yaxşı səviyyəli, daha optimal “Qəbələ” görəcəyik”

İdman xəbərləri

“Qəbələ” 2019/20 mövsümünə start verib.

Yeni mövsümdə ilk oyununu keçirən “qırmızı-qaralar” Avropa Liqasına mübarizəyə başlayıb.

Yarışa II təsnifat mərhələsindən start verən komandamız Gürcüstanın ən titullu klubu “Dinamo” ilə üz-üzə gəlib.

Tbilisi klubunu Qəbələ şəhər stadionunda qəbul edən Sənan Qurbanovun yetirmələri mərhələ adlamaq üçün münasib nəticə əldə etməyə çalışıblar.

Matç qarşılıqlı hücumlarla başlayıb. İlk dəqiqələrdən daha fəal təsir bağışlayan “Qəbələ” ardıcıl bir neçə təhlükəli vəziyyət yaradıb.

Birinci hissədə Klesio Baukun fəallığı qapı istiqamətindəki zərbələri ilə nəticələnib. Lakin bir neçə dəfə qapını nişan alan legioner hesabı aça bilməyib.

Yusif Nəbiyevin hava ötürməsini başla tamamlayan İvitsa Juniç də çərçivəyə düşə bilməyib. Səfərdə müdafiə olunmaq istəməyən qonaqların da həmlələri təhlükəli alınıb.

Levan Kutalyanın ilk cəhdindən Anar Nəzirov yaxın məsafədən zərbəni dəf edə bilib. Bir neçə dəqiqə sonra isə gürcüstanlı hesabı açmağa müvəffəq olub.

Fasilədən sonra da görüşün ssenarisi dəyişməyib. Hər iki komandanın hücumları ilə keçən matçda qapıçıların inamlı oyunu diqqət çəkib.

Nəzirov “qırmızı-qaralar”ı bir neçə dəfə qoldan xilas edə bilib. Ülvi İsgəndərovla Davit Volkovun rəqib qapısına göndərdiyi zərbələr də yaddaqalan, lakin qeyri-dəqiq olub.

Matçın sonlarında fəallığı artıran qonaqlar hakimin final fitinə üç dəqiqə qalmış ikinci qolu vurublar. Arpanq Daffe 87-ci dəqiqədə Anarın qoruduğu qapıya yol tapıb.

Cavab oyunu avqustun 1-də Tbilisidəki Boris Payçadze adına stadionda keçiriləcək.

Sizi “qırmızı-qaralar”ın baş məşqçisi Zaur Həşimovun fikirləri ilə tanış edirik: “Yaxşı, mobil komandaya qarşı oynadıq. A

naliz etmişdik və bilirdik ki, fiziki, atletik, həm də komanda şəklində hazırlıqlı komandadır. Bunu meydanda da göstərdilər ki, hazırda optimal formadadırlar.

Əbəs yerə Gürcüstan çempionatında lider deyil. Komandamız haqda onu deyə bilərəm ki, İvitsa ilk matçına çıxırdı,

Davit zədəli idi, bəzi legionerlər yenidirlər. Yaratdığımz bütün qol imkanları uzun ötürmələrdən sonra gerçəkləşdi.

Hücum planında rəqibin arxasına ötürmələrlə yaxşı nəticə qazanmaq fikrimiz var idi. Belə ötürmələr əksər hallarda alınırdı.

Amma son zərbələr çərçivəyə getmirdi. Hazırda Ülvi İsgəndərov yaxşı formadadır. Ukrayna klubları ilə yoxlama matçlarında da yaxşı oynayıb, qol vurdu.

İlk avrokubok matçına çıxdığı üçün ola bilər ki, bir az həyəcanlı idi. O, güvəndiyimiz futbolçudur və qarşıdakı bir ildə komandaya xeyir verəcək.

Rəqibi daha yaxşı tanıdıq. Üstün və zəif cəhətlərini bildik. “Dinamo” burda 2:0 hesabı ilə qələbə qazandı. Səfərə qalib gəlməyə gedəcəyik.

Komandamızda gənc futbolçular var, akademiyadan yeni oyunçular götürmüşük, legionerlər gec qoşulublar.

Deyə bilərəm ki, yeni mövsümdə çempionatda daha yaxşı səviyyəli, daha optimal “Qəbələ” görəcəyik”.

“Qəbələ” – “Dinamo” (Tbilisi, Gürcüstan) 0:2

Qəbələ şəhər stadionu

Baş hakim: Nikolas Uolş

Baş hakimin köməkçiləri: Alan Malvanni, Cordan Stokoe

Dördüncü hakim: Qavin Dunkan (hamısı Şotlandiya)

Hakim-inspektor: Quy Qoetals (Belçika)

UEFA nümayəndəsi: Mixalis Mitas (Kipr)

Sarı vərəqələr: Fernan Lopez, 5, Klesio Bauk, 6, Merab Qiqauri, 39, Rasim Ramaldanov, 45+2, Davit Volkov, 58, Kristian Kouakou, 90+1 // Nodar Kavtaradze, 45+2, Levan Şengeliya, 60, Levan Kutalya, 62, Georgi Papava, 68, Bakar Kardava, 74

Qollar: Levan Kutalya, 41, Arpanq Daffe, 87

Artırılan vaxt: I hissədə 2 dəq.; II hissədə 5 dəq.

“Qəbələ”

1. Anar Nəzirov (k)

2. Amin Seydiyev

3. İvitsa Juniç

5. Rasim Ramaldanov

8. Qismət Alıyev

(11. Asif Məmmədov, 84)

9. Davit Volkov

(19. Rövlan Muradov, 61)

10. Klesio Bauk