Avropa Liqasının ikinci təsnifat mərhələsinin "Arsenal"la ilk görüşünə hazırlaşan "Neftçi"nin kapitanı Emin Mahmudov Tula klubu ilə qarşılaşmadan öncə jurnalistlər qarşısına çıxıb.
Sportinfo.az-ın Rusiyaya ezam olunan əməkdaşının verdiyi xəbərə görə, "ağ-qaralar"ın lideri görüşə kifayət qədər ciddi hazırlaşdıqlarının bildirib:
"Bizi çətin oyun gözləyir. Bura qələbə qazanmaq üçün gəlmişik. Müsbət nəticə ilə dönəcəyimizə ümid edirəm.
Deyərdim ki, "Arsenal" və "Neftçi"nin legionerlərinin səviyyəsi arasında ciddi fərq yoxdu. Əlbəttə, Rusiyadakı top-klublarda daha yaxşı əcnəbilər var.
Ancaq ikinci "8-lik"dəkilərlə Azərbaycan Premyer Liqasında çıxış edənlərlə eyni səviyyədədilər.
Kirill Kombarovla 2 il bir yerdə oynamışıq. Həmçinin başqa oyunçular, elə də köməkçi məşqçi ilə tanışam. Görüşəndə onlarla danışacağam, münasibət saxlayıram".
Tula şəhərində keçiriləcək matç iyulun 25-də, Bakı vaxtı ilə saat 21:00-da start götürəcək.
