Almaniyanın “Bild” nəşrində Bakıda keçiriləcək Avropa Liqasının final oyunu ilə bağlı geniş yazı dərc olunub.

Sportinfo.az xəbər verir ki, məqalədə Azərbaycan paytaxtının ilk dəfə 26 may 2012-ci ildə “Eurovision” mahnı yarışmasına ev sahibliyi etməklə diqqət mərkəzinə düşdüyü vurğulanıb.

Qeyd olunub ki, Bakı çoxlu sayda tarixi və müasir tikililərdən ibarət cəlbedici şəhərdi: “Qafqazın ən sıx məskunlaşmış şəhəri dəniz kənarında yerləşir və adının mənası “güclü külək” deməkdi.

Orda 2000-ci ildə UNESCO-nun Ümumdünya irsi siyahısına salınmış Qız Qalası, Şirvanşahlar Sarayı və böyük məscid var.

Maraqlıdı ki, şəhərdə yəhudi, xristian və islam dini məbədləri mövcuddur. Bakıda bir az Parisdən, bir az Dubaydan, bir az da Moskvadan var. Yəni, bu 3 şəhərin özəlliklərini özündə cəmləşdirib”.

Yazıda mayın 29-da Avropa Liqasının final matçının baş tutacağı Bakı Olimpiya Stadionu barədə də məlumat verilib və arenaya getmək üçün marşrut izah olunub:

“Bakı Olimpiya Stadionu 2015-ci ildə istifadəyə verilib. Stadion məşq meydançaları və yaşayış binalarının olduğu Atletlər Kəndinin ərazisindədir.

Şəhər 2016 və 2020-ci illərdə Yay Olimpiya Oyunlarına namizəd olub. Stadion hava limanı yaxınlığındadır və ora taksi ilə getmək asandı.

Ən yaxın metro stansiyası “Koroğlu”dur. Oradan stadiona piyada 12 dəqiqəyə getmək mümkündür. Vaxtınız çox olarsa, stadionda tura çıxa bilərsiz.

Ekskursiya təkcə oyun günləri təşkil edilmir. Frankfurtdan Bakıya uçuş biletləri birbaşa və tranzit olmaqla 130 avrodan başlayır.

Bəzi şirkətlər müxtəlif paketlər təklif edir. Məsələn, “Vietentours” 298 avrodan və ya Fanreisen24.com 510 avrodan başlayan paketlər satır.

Paketə otel, stadiona gediş-dönüş və şəhərdə ekskursiya daxildir. Bilet qiyməti paketə aid deyil”.

Mayın 29-da saat 23:00-da başlayacaq finalda “Arsenal” və “Çelsi” qarşılaşacaq.