Məşhur karikaturaçı Omar Momani Bakıda keçiriləcək Avropa Liqasının final matçı ilə əlaqədar yeni rəsm çəkib.
Sportinfo.az xəbər verir ki, Momani həlledici matçın iştirakçıları - "Çelsi" və Arsenal"ın üzvlərini Azərbaycanın səhər yeməyində təsvir edib.
Fotoda "Çelsi"nin baş məşqçisi Mauritsio Sarri, komandanın futbolçuları Eden Azar, N Qolo Kante, "Arsenal"dan isə Pyer-Emerik Obameyanq, Mesut Özil və Aleksandr Lyakazett yer alıb.
Momani bunlarla yanaşı, "Liverpul"un baş məşqçisi Yurgen Kloppu da karikaturaya əlavə edib.
O, "Cənab, Klopp, bizə qoşul! Azərbaycanın səhər yeməyi insanları birləşdirir və hər kəsi xoşbəxt edir! Bunu mütləq dadın!" yazıb.
Bir müddət əvvəl Yurgen Klopp Avropa Liqasının finalının Azərbaycanda keçirilməsini "Bu qərarı verənlər səhər nə yeyirlər?" deyə tənqid edib. Final oyunu mayın 29-da Bakı Olimpiya Stadionunda təşkil olunacaq.
