Avropa Liqasının I təsnifat mərhələsində iyunun 29-da keçiriləcək "Zirə" - "Differdanj" oyunu öncəsi açıq məşqlərin vaxtları müəyyənləşib. Sportinfo.az xəbər verir ki, matçın keçiriləcəyi "Dalğa Arena"da ilk olaraq rəqib son məşqə çıxacaq. Bu, iyunun 28-də saat 19:30-da olacaq.
"Zirə"nin açıq məşqi həmin stadionda saat 21:00-da başlayacaq. Oyunöncəsi mətbuat konfransları ilə bağlı vəziyyət bir az fərqlidi. Məsələ ondadır ki, "Zirə" öz konfransının vaxtını saat 20:30-a planlaşdırıb. Lüksemburqlular bunu keçirib-keçirməyəcəkləri bağlı zirəlilərə hələ ki cavab verməyiblər.
Mərdəkanda keçiriləcək matç saat 21:00-da başlayacaq. Bu yerdə qeyd edək ki, qrup mərhələsindən fərqli olaraq təsnifat mərhələsində klubların UEFA qarşısında belə bir öhdəçilik yoxdu. "Differdanj"ın baş məşqçisi jurnalistlər qarşısına çıxarsa, bu, saat 19:00-a gözlənilir.
"Zirə" çempionatda olduğu kimi, debüt etdiyi avrokuboklarda da jurnalistlərin nəqliyyatla təmin olunma məsələsinə xüsusi diqqət ayıracaq. Belə ki, həm oyunöncəsi mətbuat konfransına, həm də matça gedib-qayıtmaq üçün avtobus nəzərdə tutulub. Sadəcə, avtobus həmiə olduğu kimi "Koroğlu" yox, "Gənclik" metrostansiyasının çıxışından yola çıxacaq. Bunun hansı vaxtda olacağı sonradan açıqlanacaq.
