"Mətbuatda yazılanlarla bağlı məsuliyyət daşımıram"

26 Noyabr 2019 14:30 Müsahibə 501
"Mətbuatda yazılanlarla bağlı məsuliyyət daşımıram"

"Zirə"nin paraqvaylı hücumçusu Xulio Sezar Rodriges Sportinfo.az-a müsahibə verib.

- Əvvəlcə ötən tur "Keşlə"ni 3:1 hesabı ilə məğlub etdiyiniz oyun barədə fikirlərinizi bilmək istərdim. 2 qol, 1 məhsuldar ötürmə ilə oynadız.

- Yaxşı oyun oldu, rəqibin müdafiədən hücum qurmasını əngəlləmək üçün irəlidə pressinq tətbiq etməyimiz işimizə yaradı. Onların itirdiyi toplardan sonra dərhal qurduğumuz hücumlar nəticəsində ardıcıl qollar vurduq.

- "Keşlə" sizinlə qarşılaşmaya qədər 2-ci pillədə idi. Bu cür asan qələbə qazanacağınızı gözləyirdiz?

- Açığı, "Keşlə"yə qarşı oyun düşündüyünüz qədər asan olmadı. Rəqibdən daha yaxşı oynadığımız və yaratdığımız qol imkanlarından faydalandığımız üçün qələbə qazandıq.

- Ötən turu qeyri-müəyyən səbəbdən buraxmışdız. Bizdə olan məlumata görə, Samir Abasovla bağlı səsləndirdiyiniz fikrə görə cəzalandırılmışdız...

- Mətbuatda yazılanlarla bağlı məsuliyyət daşımıram. Mən sadəcə, zədəli idim.

- Zaur Həşimovun gəlişindən sonra komandada canlanma hiss olunur. "Keşlə" üzərində qələbə də bunu sübut etdi. Maraqlıdır, Həşimov komandaya nə yenilik gətirib ki, futbolçular meydanda can qoyurlar?

- Biz həmişə meydanda can qoymuşuq. Komanda qol vəziyyətləri yaradır və bundan maksimum faydalanmağa çalışır.

- Riçard Qadze ilə meydanda bir-birinizi yaxşı başa düşürsüz. Yəqin, adaptasiyanın bu qədər tez olacağını gözləmirdiz...

- Hər ikimiz komanda üçün oynayırıq. Ona görə də meydanda yaxşı anlaşırıq.

- Geridə qalan 12 tur ərzində 4 qol vurmusuz. Bu mövsüm üçün qol hədəfiniz neçədir?

- Məqsəd həmişə öz üzərimdə çalışmaq, bacardığım qədər çox qollar vurmaqdır. Amma ən önəmlisi komandadır. Komanda yaxşı oynayanda qollar özü gəlir.

Elur SALAHOV

Digər Xəbərlər
Xəbər Lenti
4 İyul 21:00 Azərbaycana vaxt verdi