"Şəfa"nın yeni transferi Andrey Fernando Draqu Sportinfo.az-a müsahibə verib.

Rumıniyalı sol cinah müdafiəçisi "İmişli" ilə sınaq matçında (2:2) sonra bizimlə söhbətində davam edən təlim-məşq toplanışı, ölkəmizə gəlişi və gələcək planlarından danışıb.

- Toplanış necə keçir?

- Hazırda hər şey qaydasındadır. Normal olaraq komandanın formalaşma mərhələsidir. Hələ də adaptasiya prosesindəyəm, amma bu, çox çəkməyəcək.

- İlk yoxlama görüşü barədə nələr deyə bilərsən?

- ​Bizim üçün yaxşı ilk yoxlama görüşü oldu. Nəticə o qədər də önəmli deyildi. Əsas diqqətimizi oyun praktikası qazanmağa, fiziki formamızı yaxşılaşdırmağa və məşqlərdə öyrəndiklərimizi meydanda tətbiq etməyə yönəltmişdik.

- "Şəfa"ya transferin necə baş tutdu?

- ​Transfer olduqca tez baş tutdu. Agentlərimlə danışdım və onlar mənə klubun layihəsini təqdim etdilər. Karyeramın bu mərhələsində bunun mənim üçün ən doğru seçim olduğunu hiss etdim.

- İlk dəfə legioner həyatı yaşayacaqsan. Bu günə qədər ölkə xaricindən təklifin olmayıb, yoxsa getməkdə maraqlı olmamısan?

- ​Daha əvvəl də təkliflərim olmuşdu, lakin getmək istəməmişdim. Bu dəfə isə ayrılmaq üçün doğru zaman olduğunu hiss etdim.

- Bura gələnə qədər Azərbaycan futbolu ilə bağlı nələr bilirdin?

- ​Bəzi rumıniyalı futbolçuların burada çıxış etdiyini və Azərbaycan klublarının avrokuboklarda mübarizə apardığını bilirdim.

- Azərbaycanda çıxış etmiş həmyerlilərindən dostluq etdiyin kimsə var?

- ​Bəli, dostlarımdan biri Andrey Tırkoveanudur "Şamaxı"nın sabiq yarımmüdafiəçisi). Bura gəlməzdən əvvəl zəng etdiyim ilk insan o oldu və mənə yalnız müsbət şeylər danışdı.

XANOĞLAN İMANOV