“Qəbələ”nin hazırkı heyətinin ən yaxşısı Adriel Ba Luadan çox əziyyət çəkən yoxdur.

Fransalı yarımmüdafiəçi fərdi ustalığı hesabına nəsə etməyə çalışır, rəqiblərə nəfəs almaq imkanı vermir, lakin yanında özü kimilərin olmaması işini xeyli çətinləşdirir.

Komandasının “Zirə”yə məğlubiyyətindən sonra (0:1) avtobusun yanında dayanıb gözlərini bir nöqtəyə zilləyən Ba Lua ilə söhbət etmək üçün əla imkan idi.

Əhvalı yerində olmasa da, Sportinfo.az-ın suallarını cavablandırdı.

- Növbəti oyun və yenə məğlubiyyət.

- Bəli, yenə uduzduq (dərindən ah çəkir). Yaxşı komandaya sahibik, nələrsə etməyə çalışırıq, lakin alınmır. Həm qol vura bilmirik, həm müdafiədə səhvlər edirik. Düzələr yəqin.

- Penalti epizodunda topa sənin yaxınlaşacağını gözləsək də, İbrahim Sanqare məsuliyyəti üzərinə götürdü və əla imkanı boşa verdi. Niyə sən yox, o?

- Penaltiləri ikimiz vururuq. Lakin topa İbrahim yaxın idi deyə, birinci o götürdü. 11 metrlik zərbə elədir ki, “nöqtə”yə həmin an özünə əmin olan futbolçu yaxınlaşır. Problemimiz penaltini boşa verməkdə, yaxud zərbəni kimin vurmasında deyil. Deyək ki, oyunda penalti olmayıb. Bəs, digər epizodlardakı şanslar?

- Maraqlıdır ki, ikinci hissədə sonradan ləğv olunan penalti zamanı da topu əlinə götürməyə tərəddüd edirdin. Sanki komandada heç kim məsuliyyətin altında girmək istəmir.

- Xeyr-xeyr, belə deyil. İkinci penaltini onsuz da mən vuracaqdım. Tərəddüdüm bilirsiz nə ilə bağlı idi? Hakim qərar versə də, epizod VAR-da izlənilməliydi. Və görəndə ki, söhbət uzanır, referinin VAR-a gedəcəyini hiss etdim. Rəqib futbolçular da topun ələ yox, başa dəydiyini deyirdi deyə, hakimin son qərarını gözləyirdim.

- “Qəbələ”nin oyunlarını izləyəndə səni gəmini xilas etməyə çalışan tək qalmış kapitan rolunda görürük. Bu, səni sıxmır, yormur, bezdirmir?

- Xoş sözləriniz üçün təşəkkür edirəm. Lakin futbolda 11 nəfər 11 nəfərə qarşı oynayır. Oyun vaxtı “Qəbələ”də məndən başqa 10 nəfər olur. Onlar olmasa, mən təkbaşıma heç nə edə bilmərəm. Mənə inam verən, imkanlar yaradan komanda yoldaşlarımdır. Ona görə də özümü heç kimdən üstün saymıram. Ola bilsin əksər vaxtlarda məsuliyyəti üzərimə götürüb nəsə etməyə çalışıram, topla daha çox davranıram. Lakin bu, komandanın təkcə məndən ibarət olması anlamına gəlməməlidir. Bir çox oyunlarda rəqibin bir neçə futbolçusu məni diqqətdə saxlayır. Və belə olanda hərəkət, zərbə, qaçış imkanlarım məhdudlaşır. Lakin mən superman deyiləm ki, təkbaşıma rəqibin 11 futbolçusuna qarşı oynayım.

- 12 oyundan cəmi 5 xal. Vəziyyəti yaxşıya doğru dəyişmək üçün çıxış yolu görürsən?

- Bu gün üçün hansısa ideyam yoxdur. Qarşıda bizi finala bərabər 5 çətin oyun gözləyir. Hələlik 1 xal qazanmaq barədə düşünməliyik. 1-2 dəfə bunu etsək, ondan sonra qələbənin planlarını cızarıq. Sakit olmalı, səhvlərimizi bilməli və aradan qaldırmalıyıq – çıxış yolu budur.

HƏBİB