Birinci Liqanın 6-cı turu çempionluğa iddialı iki komandanın - "Şəfa" və "Səbail" qarşıdurması ilə yadda qaldı - 2:2.

Bayıl təmsilçisinin kapitanı Yusif Nəbiyev Sportinfo.az-a müsahibə verib.

- Çempionluq yolunda əsas rəqibinizlə oyun bərabərlik qeydə alındı. Oyun barədə nələr deyə bilərsən?

- Maraqlı oyun oldu. Hər iki komanda qələbə qazanmaq istəyirdi. Amma ehtiyatı da əldən vermirdik. Səfərdə 1 xal yaxşıdır. Əlbəttə, qələbə olsa daha yaxşı olardı. Amma əsas məğlub olmamaqdır.

- Əsas uduzmamaq idi, yoxsa bir xala sevinmədiniz?

- Belə görüşlərdə məqsəd məğlub olmamaqdır. Bir xal qənaətbəxşdir.

- Görünən odur ki, "Şəfa" hələ uzun müddət mübarizədən qopmayacaq. Bu məqam narahatlıq yaradır?

- Xeyr, heç bir narahatlıq yoxdur. Hələ qarşıda oyunlarımız çoxdur.

- Ümumi birinci Liqanın vəziyyəti barədə nələr deyə bilərsən?

- Birinci Liqanın səviyyəsi deyəndə ki... Əsas liqa ilə fərqlər çoxdur. Stadionlar, soyunub-geyinmə otaqları normal deyil. Adi bir şeyi deyim.

- Buyur...

- Meydançaları sulamaq belə yoxdur. Bu da oyunlarda çətinlik yaradır.

- Premyer Liqanı yəqin ki, izləyirsən. Kənardan daha yaxşı görünür bir çox şeylər. Ötən illə müqayisədə nələr dəyişib? Səviyyə barədə nələr deyə bilərsən?

- Bəli, izləyirəm. İştirak etmədiyim liqadan nəsə demək düz olmaz. Belə yaxşı, maraqlı oyunlar olur.

- Son olaraq elita üçün darıxırsan? Heç bu barədə yüksək liqa təcrübəsi olan komanda yoldaşlarınla dərdləşdiyiniz anlar olur?

- Olmur desəm yalan olar. Oyunlara baxanda adam darıxır. İnşallah, komanda olaraq ora qayıtmaq üçün vuruşacağıq.

XANOĞLAN İMANOV