Hamidu Keyta hazırda “Araz-Naxçıvan”da əvəzedici statusunu daşıyır.
Halbuki indi başqa klubda və daim “11-lik”də ola bilərdi.
İndi isə 2 il əvvəl verdiyi yanlış qərarın acısını çəkir.
2022-in yanvarında “Santa-Klara”dan (Portuqaliya) “Zirə”yə keçən, “qartallar”ın heyətində keçirdiyi 54 oyunda 15 qol vurub, 12 assistə imzasını yazdıran cinah hücumçusu 2023-ün yayında “Qarabağ”ı seçməklə karyerasının bəlkə də ən yanlış qərarını verdi.
Mütəmadi oynamaq imkanı çətin görünən yerə - Abdullah Zubirlə rəqabətə yollandı və kölgədə qaldı.
Səhvini 1 ildən sonra anlayanda isə Azərbaycanı tərk etmək fikrinə düşdü. Bu dəfə “Konyaspor”a kömək etmək niyyəti ilə Türkiyəyə uçdu. Burada da ümidləri doğrulda bilmədiyindən, 1 ildən sonra yenidən Azərbaycana – “Araz-Naxçıvan”a qayıtdı.
Keyta ilə komandasının “Qəbələ” üzərində qazandığı 2:1 hesablı qələbədən danışanda, bilərəkdən söhbəti “Zirə”dəki dönəmə apardım və müsahibə verməklə arası olmayan fransızla maraqlı sual-cavab alındı.
- “Zirə”də gördüyümüz Keyta hanı?
- Gəlir, gəlir (gülür).
- 2 ildi haradaydı?
- “Qarabağ”a getdim, nələrsə etməyə çalışdım. Qollar vurdum, qol ötürmələri verdim. Sonra yeni macəra üçün Türkiyə Super Liqasının yolunu tutdum.
- Lakin işlər heç də istədiyin kimi getmədi.
- Elədir. “Qarabağ”da güclü futbolçular cəmlənib. Nə vaxt şans qazanmışdımsa, meydanda bacardığımın 100 faizini etmişdim. “Konyaspor”da da həmçinin, şans veriləndə komandama kömək etməyə çalışırdım.
- Məhsuldarlıq baxımından “Zirə”dəki qədər faydalı olmadın.
- Futbol belədir. Heç də həmişə uğurlu qrafikdə dayana bilmirsən. Hər bir futbolçunun karyerasında uğurlu və sakit dönəmlər olur. Ümid edirəm ki, ən yaxın zamanda əvvəlki Keytanı xatırldacağam.
- “Qarabağ”dan getdin, yoxsa göndərildin?
- Klubla müqaviləm davam edirdi. Getmək qərarını özüm verdim. Çünki daha çox oynamaq istəyirdim.
- Keçmişə boylananda səhv verdiyin nöqtəni müəyyən edə bilirsən?
- Səhv etdiyimi düşünümrəm. İnsan qərar verəndə səhv etmək barədə yox, yaxşı olması barədə fikirləşir. “Qarabağ”a keçidim özümə də xoş idi və komandaya fayda vermək istəyirdik. Bir mövsümdə 9-10 qol vurmaq pis göstərici sayıla bilməz. Sadəcə, daha yaxşısını istəyirdim deyə, Türkiyəyə yollandım.
- Peşman olana oxşamırsan.
- Geriyə qayıtmaq imkanım olsa, yeni eyni addımı atardım. Çünki “Zirə”dən ayrılandan sonra verdiyim qərarlar yaxşıya doğru olub. Ehtiyatda qalmağım, daha çox qol vura bilməməyim – bunlar futbolla bağlı olan məqamlardır. Bir şey də deyim.
HƏBİB / SPORTİNFO.AZ
