Premyer Liqaya yeni vəsiqə qazanan klublardan biri də “Karvan”dır.

Hazırda klub və komanda ilə bağlı cavabsız qalan sualların sayı kifayət qədərdir.

“Karvan”ın vitse-prezidenti Kənan Kərimovla söhbətimizin məqsədi də həmin suallara cavab tapmaq idi.

- Çətinliklə əldə olunan qələbədən sonra rahat nəfəs almaq olar?

- Həqiqətən ağır oyun oldu. Belə məqamda 3 xal bizim üçün çox önəmli idi. Bildiyiniz kimi, stadionumuzun hazır olmamasına görə yollarda çox vaxt itiririk. Gah Mingəçevirdə, gah da Yevlaxda məşq edirik. Məlum səbəbdən təlim-məşq toplanışını da istədiyimiz səviyyədə keçə bilmədik. Heyəti demək olar 100 faiz dəyişdik. Oyun səviyyəsini yaxşılaşdırmaq üçün müəyyən zamana ehtiyacımız var.

- Heyət komplektləşib, yoxsa yeni futbolçuların gəlişi mümkündür?

- Hələ ki, transfer gözlənilmir. Azı qış fasiləsinə qədər bu heyətlə davam edəcəyik.

- Zədə və cəza risklərini nəzərə alsaq, heyət kasad görünmür ki?

- Elə futbolçular var ki, mövsümün başlamasına bir həftə qalmış kollektivə qoşulub. Uyğunlaşma ilə bağlı müəyyən çətinliklər yaşanır. Zədəli futbolçularımız da var. Oyunumuzu bir az da yaxşılaşdırsaq, turnir cədvəlindəki yerimizi möhkəmləndirə bilərik.

- Startda 4 xal. Bu cür başlanğıc gözləyirdiniz?

- Elitada qalmaq uğrunda əsas rəqiblərimizə qarşı oynadıq. Xüsusən “Kəpəz”lə matçdakı qələbəni 6 yox, 9 xala bərabər hesab edə bilərik. Builki çempionat daha çox əzmkarlıq və mübarizlik tələb edir. Dünənki oyunlara baxsaq, “İmişli” “Neftçi” kimi rəqiblə heç-heçə oynadı, “Sumqayıt” səfərdə “Qarabağ”ı məğlub etdi. Bu, istək sayəsində baş verdi.

- Qazonun yenilənməsi prosesi nə vaxt başa çatacaq? Yevlaxlı azarkeşlər sevimli komandalarını nə vaxt Yevlaxda görə biləcək?

- İşlər sürətli şəkildə davam edir. “Qarabağ”la oyuna qədər çatdırmağa çalışırlar. “Kəpəz”lə oyun üçün Yevlaxdan Qəbələ çox sayda azarkeş gəlmişdi. Hər birinə təşəkkür edirəm. Rəqiblərimizi Yevlaxda qəbul etsək, möhtəşəm atmosfer yaşanacaq.

- Komandanın qarşısına qoyulan hədəf elitadakı yeri qorumaqdır?

- Hamının bildiyi kimi, yeni formalaşmış komandadır. Bu gün desəm ki, avrokuboklara vəsiqə, yaxud medal uğrunda mübarizə aparacağıq, yalan olar. Məqsədimiz Premyer Liqadakı yerimizi qorumaqdır.

- Məlum məşqçilik kateqoriyası probleminə görə texniki zonada yer ala bilmirsiniz. Oyunları kənardan izləmək çətindir yəqin.

- Çətin yox, dözülməzdir. İnanın, özümə yer tapa bilmirəm. Buna baxmayaraq, tez-tez məşqçilərlə əlaqə saxlayıb, lazım olan tapşırıqları verirəm.

- AFFA iki kluba güzəşt edərək “Karvan-Yevlax”la “İmişli”ni U-17, U-19 və Əvəzedicilər Liqasından azad edib. Bu qərar yaxın gələcəkdə yevlaxlı gənclərlə güclənmək baxımından nə dərəcədə çətinlik yarada bilər?

- Fürsətdən istifadə edib bu yöndə bizə köməklik göstərən AFFA-ya təşəkkür edirəm. Bu dəstəyə həqiqətən ehtiyacımız var idi. “Karvan-Yevlax”ın uzun müddət Premyer Liqada olmaması akademiyanın bərbad duruma düşməsi ilə nəticələnib. Artıq Premyer Liqadayıq və verilən zamana uyğun olaraq çatışmazlıqları aradan qaldırmaq yönündə müəyyən işlər görməyə çalışırıq.

- Hazırda Yevlaxda aşağı yaş qruplarından ibarət komandalar mövcuddur?

- Bəli, komandalar var. 12-13 yaşlı uşaqlardan komandalar formalaşıb. Artıq yuxarı yaş qruplarının yaradılması ilə bağlı işlər görülməkdədir. İnşallah, elitadakı yerimizi qoruya bilsək, növbəti mövsümdə bütün yaş qruplarımız çempionatlarda iştirak edəcək.

- Müstəqillik tarixində Yevlax futbolunun yetirmələri deyəndə, ağıllarda Kənan və Sahil Kərimov qardaşları canlanır. Sizdən sonrakı nəsillərdə kimlərin adlarını çəkə bilərsiz?

- Ürək ağrısı ilə deyə bilərəm ki, bu gün Premyer Liqa səviyyəsində futbolçumuz yoxdur. Bizdən sonrakı dövrdə Bəhruz və Məşfiq Teymurov qardaşları yetişmişdi. Lakin indi kiminsə adını çəkə bilmərəm.

- Yaxın gələcək üçün perspektiv görünür?

- Aşağı yaş qruplarında talantlı uşaqlar var. “Turan Tovuz”un, “Sabah”ın, “Qarabağ” akademiyalarında, “Ulduz”da yevlaxlı futbolçular oynayır. Lakin onlar hələ yeniyetmədirlər – 13-14 yaşları var. Gələcəkdə işlərimiz plan üzrə davam etsə, həmin uşaqları Yevlaxa gətirməyə çalışacağıq.

- Yevlaxda uşaq futbolu üçün şərait nə yerdədir?

- Vəziyyət yaxşı deyil. Az öncə dediyim kimi, bu yöndə işlərə start verilib. Müəyyən qədər vaxt alan prosesdir. Əminəm ki, çatışmazlıqları aradan qaldırmaq mümkün olacaq.

Həbib Aslanov