“Qarabağ” – “Ferenetsvaroş” qarşılaşmasından sonra qonaq komandanın üzvlərinin əhval-ruhiyyəsi ürək ağrıdırdı.

Səfərdə qalib gəlmələrinə baxmayaraq, Çempionlar Liqasının Liqa mərhələsinə vəsiqə qazana bilməmələri boyunlarını sözün əsl mənasında bükmüşdü.

Macarıstan millisinin şərəfini qoruyan, Bakıdakı matçda “Qarabağ”ın qapısına mükəmməl qol vuran 19 yaşlı Aleks Tot üzgün olmasına rəğmən, Sportinfo.az-a müsahibə verməkdən boyun qaçırmadı.

- Mərhələni adlamağınıza nə mane oldu?

- Komandalar arasında fərq böyük deyildi. Belə olan halda qol imkanlarından düzgün yararlanan tərəf qələbə qazanır. İki oyuna görə “Qarabağ” bunu yaxşı bacardı. Sırf bu komponentdə geri qaldığımızı düşünürəm. Digər bütün cəhətlərdə rəqibi üstələməyə çalışırdıq.

- Oyuna üstün başlayıb hesabı açdınız, hətta bir neçə dəfə 2-ci qolu vurmağa yaxın idiz. Əvəzində “Qarabağ” ilk hissədə sizi iki dəfə cəzalandırdı. Nə baş verdi?

- “Qarabağ” əks-hücumlarda çox təhlükəlidir. Bunu bilirdik və üzərində çalışmışdıq. Lakin yenə diqqəti əldən verdik. Hər iki qolu bizi azlıqda yaxalayaraq vurdular.

- “Qarabağ” Liqa mərhələsinə yüksəlməyi haqq edir?

- Belə deyə bilərik. Ancaq dərindən düşünəndə biz də buna layiq idik. Çünki aramızda ciddi fərq yox idi.

- Qələbə qazanıb sevinə bilməmək çoxmu çətindir?

- Çox-çox çətindir. Budapeştdə buraxdığımız qolların və boşa verdiyimiz epizodların acısını çəkirik. İlk oyundakı nəticə başqa cür olsaydı, bu gün sevinən tərəf olacaqdıq.

- Vurduğun qolu necə təsvir edə bilərsən? Niyyətin qol vurmaq idi, yoxsa topu qapı qarşısına havalandırırdın?

- Təbii ki, qapını nişan almışdım. Məşqlərdə bunun üzərində çox işləyirəm. Uzaq məsafədən zərbələri sevirəm. Qol baxımlı ola bilər, mərhələni keçməyimizə kifayət etmədisə, o qədər də maraqlı deyil.

HƏBİB