"Sumqayıt"ın estoniyalı hücumçusu Erik Sorqa Premyer Liqanın 31-ci turunda "Turan Tovuz"a qalib gəldikləri (4:1) matç haqda Sportinfo.az-a müsahibə verib.
- Startda rəqibin meydanda, azarkeşlərin isə tribunada böyük təzyiqi vardı. Bunu necə arxada qoya bildiniz?
- Belə təzyiq altında ilk dəfə oynamıram. Ona görə də mənim üçün fərqi yoxdur. Komanda üçün əsas olan bu qarşılaşmada rəqib nə qədər mane olsa da , qələbə qazana bilməyimizdir. Azarkeşlərin də təzyiqi rəqibə kömək etmədi.
- Tovuz səfəri hər zaman ağır səfər hesab olunur. Oyundan əvvəl bərabərlik təklif olunsaydı, razılaşardız?
- Bərabərlik üçün bu qədər saat yol getməyin mənası yoxdur. Oraya yalnız qələbə qazanmaq məqsədi ilə getmişdik.
- 4:1 hesabı sizi də təəccübləndirdimi?
- Şadam ki, şanslarımızı qola çevirə bildik. Əvvəlki matçlarda bu, mümkün olmurdu.
- "Sumqayıt" avrokubokların astanasındadır. Son 5 tur üçün şanslarınızı necə dəyərləndirirsən?
- Əgər “Turan”a qarşı oynadığımız kimi davam edə bilsək, bizi yaxşı şeylər gözləyir.
XANOĞLAN İMANOV