“Turan Tovuz”un yarımmüdafiəçisi Fərid Nəbiyev Premyer Liqanın 26-cı turunda “Araz Naxçıvan”ı məğlub etdikləri (2:0) oyun haqda Sportinfo.az-a müsahibə verib.
- Qələbəni necə şərh edərdin?
- Çətin oyun keçdi. Bilirdik ki, "Araz Naxçıvan" komandası qələbə üçün bura gəlmişdi. Əlimizdən gələnin ən yaxşısını etdik ki, azarkeşlərimizi qələbə ilə sevindirək. Şükür Allaha bu bizə nəsib oldu.
- Sönük oyun gedirdi. Amma ikinci yarının sonlarına yaxın qarşılaşmada gərginlik pik həddə çatdı. Nə baş verdi sona yaxın?
- Taktiki mübarizə gedirdi. Ələ düşəcək fürsətləri gözləyirdik. İlk hissə rəqibi yormağa çalışdıq. İkinci yarı meydana daxil olan futbolçular oyunun axarını dəyişdi. Bu da bizi məmnun edir.
- Bu qələbə ilə liderlər qrupuna yenidən yaxınlaşdınız. Avrokubok şanslarını necə görürsən?
- Hazırda avrokuboklar yox, qarşıdakı matçlar haqqında düşünürük. Çalışırıq hər oyunda xallar qazanaq və bu da gələcəkdə bizə kömək olsun.
- Hələ də əsas heyət üzvü hesab olunmursan. Özünün "Turan" karyerasını necə qiymətləndirirsən?
- Özümdən gözlədiyim daha çox şey var. Amma komandaya uyğunlaşmaq məsələsi var. "Turan"a daha çox xeyir verməyi düşünürəm.
XANOĞLAN İMANOV