"Şamaxı"nın müdafiəçisi Səbayıl Bağırov Birinci Liqanın 17-ci turunda "Karvan"ı səfərdə darmadağın etdikləri (0:6) qarşılaşmadan sonra Sportinfo.az-a müsahibə verib.
- Qarşılaşma barədə nələr deyə bilərsən?
- Matça çox ciddi hazırlaşmışdıq. Evdəki son iki bərabərlikdən sonra səfərdə qələbə qazanmaq əsas istəyimiz idi. Şükürlər olsun ki, bunu bacardıq.
- Belə hesab gözlənilməz oldu. Rəqib zəif çıxış etdi, yoxsa siz daha yaxşı göründünüz?
- Bu "Şamaxı"nın belə hesabla qələbələr qazanmaq potensialı var. Sadəcə əvvəlki oyunlarda ələ düşən şansları dəyərləndirə bilmirdik. Bu gün şükürlər olsun ki, hər şey ürəyimizcə oldu.
- "Şamaxı" Premyer Liqaya yüksəlmək üçün ən şanslı komanda kimi təqdim edilir. Bu, sizdə əlavə gərginlik yaratmır?
- Xeyr, hansısa təzyiq yaratdığını deməzdim.
- Amma 17 tur arxada qalsa da birinci pillədə lövbər salmaq hələ də mümkün olmayıb...
- Ötən mövsümlə müqayisədə bu il Birinci Liqanın səviyyəsi qalxıb. Rəqiblər güclənib. Ona görə də birinci pillə uğurunda mübarizə çətin keçir.
- Qış fasiləsində Premyer Liqanı Birinci Liqaya dəyişdin. Qərar vermək çətin olmadı?
- Bəzi amillər var, amma indi açıqlamaq istəmirəm. İnşallah, "Şamaxı" ilə Premyer Liqaya qayıdaq, onda bu suallara cavab tapılacaq.
XANOĞLAN İMANOV