"Səbail"in kapitanı Cabir Əmirli Premyer Liqanın 22-ci turunda "Kəpəz"i məğlub etdikləri (4:1) oyundan sonra Sportinfo.az-a müsahibə verib.

- Oyunu necə dəyərləndirirsiz?

- Bütün motivasiyamızı bu oyuna vermişdik. Bu matçdan qələbə ilə ayrılmaq üçün çalışırdıq. Qarşımıza növbəti turlara daha motivasiyalı çıxmağı məqsəd qoymuşduq.

- Son turlar "Kəpəz" yüksəlişdədir. Bunun fonunda belə hesabın qeydə alınması necə baş verdi?

- İlk hissə bərabər bitdi. Fasilədə uşaqlarla danışdıq ki, ikinci hissədə çıxıb öz oyunumuzu oynayıb qələbə qazanmalıyıq. İkinci qolu vurduqdan sonra "Kəpəz" daha irəlidə oynadı. Bizdə əks-hücumdan üçüncü və daha sonra dördüncü qolu vurduq.

- Bu qələbə yetərli olacaqmı ki, komanda enişdən çıxa bilsin?

- Biz enişdə deyilik. Yüksək pillələrdə olan komandalarla aramızda elə də fərq yoxdur. Bu qələbə bizə daha da motivasiya verəcək.

- Oyunu zədələnərək tərk etdiz. Ağrılar altında meydanda mübarizə aparmaq nə dərəcədə çətin idi?

- Oyunun əvvəlində ağrılar yox idi. Sadəcə matçın bir anında ayağımda ağrılar oldu. Əməliyyatdan sonra artıq üçüncü oyundur ki, meydandayam.

- Qış fasiləsindən sonra komandanın nəticələri müsbət olsaydı, baş məşqçidən daha çox istirahət etməyi xahiş edəcəkdin?

- Əməliyyatdan iki həftə sonra məşqlərə başlamışdım. Əksinə məşqçidən xahiş elədim ki, daha tez oynayım. Türkiyə toplanışında belə məşqçidən yoxlama oyunlarında şans verilməsini istədim.

XANOĞLAN İMANOV