"Neftçi"nin hücumçusu Yeqor Boqomolski Premyer Liqanın 19-cu turunun "Sabah"la bərabərə bitən (0:0) matç haqda Sportinfo.az-a müsahibə verib.
- Qış fasiləsindən sonrakı ilk qarşılaşma necə keçdi?
- Yaxşı oyun oldu. Qarşılaşmaya nəzarət edən tərəf biz idik. Rəqibi öndə yaxşı sıxırdıq. Demək olar ki, "Sabah"a epizod vermədik. 1-2 əks-hücumda imkan yaxalaya bildilər. Ümumi götürsək qarşılaşmanı idarə edən tərəf biz idik.
- Rəqibə qol imkanı vermədiniz, amma sizin də elə çox qol imkanınız olmadı...
- Qarşılıqlı olaraq bir-birimizə təhlükəli epizodlar yaratmağa imkan vermədik. Bizə verilən tapşırıq da o idi ki, rəqibin rahat oynamasına imkan verməyək. Biz də bunun öhdəsindən gəldik. Ən vacibi isə sol cinahdan rəqibin Letiçlə qurulan hücumlarının qarşısını ala bildik.
- Bir xal qazandınız, yoxsa iki xala itirdiyinizi düşünürsən?
- "Neftçi"də oynayırsansa hər oyuna 3 xal üçün çıxırsan. Lakin bu gün səfərdə qazanılan bərabərlik də pis nəticə sayılmamalıdır.
- Bu gün zədə səbəbindən matçı buraxmalı olan Kilan Lebon, Qara Qarayev və Reziuan Mirzov kimi əsas heyət üzvləri meydanda olsaydı nəticə fərqli ola bilərdi?
- Düşünürəm ki, bizdə əvəzedilməz futbolçu yoxdur. Hər birimizi layiqincə əvəzləyəcək komanda yoldaşımız var. Bu gün də həmin futbolçuların mövqeyində çıxış edənlər özlərini heç də pis göstərmədilər.
- Miodroq Bojoviç ilk gündən sənə çox güvənir. Amma hələ də ümidləri doğrulda bilmirsən. Buna nə mane olur?
- Düşünürəm ki, özümü tam isbat etməyim üçün qolum çatmır. Qarşıdakı oyunlarda bunu dəyişə biləcəyimi düşünürəm. Çıxışımı normal qiymətləndirirəm. Yaxşı onda olacaq ki, mən qollar vuracam.
- Komanda da bu gün hücumçu qıtlığı hiss olunur. Rəqabətsiz davam etmək sənə necə təsir edir?
- Tək olduğumu deməzdim. Mövqeyimdə Lukas Melano da oynayır. Onunla rəqabət aparıram. Rəqabətin olması isə hər zaman xeyirlidir.
XANOĞLAN İMANOV