1994-1998-ci illər aralığında Azərbaycan millisinin qapısını qoruyan Aleksandr Jidkov məşqçilik karyerasını ölkəmizdə davam etdirməyi qərara alıb.

“İrəvan”da Nazim Süleymanovun köməkçisi kimi çalışan 58 yaşlı mütəxəssis bir aya yaxındır ölkəmizdədir.

Jidkov Sportinfo.az-a müsahibə verib.

- Təxminən 25 illik fasilədən sonra qayıtdığınız Bakıda özünüzü necə hiss edirsiniz?

- Sizcə, Bakıda özünü pis hiss etmək olar? Özümü inanılmaz dərəcədə xoşbəxt hiss edirəm. Bakını görən kimi gənclik illərimə qayıtdın. Amma bu dəfə əvvəlkinə nisbətən təcrübəliyəm (gülümsəyir).

- Yəqin ki, şəhəri gəzmək üçün kifayət qədər vaxtınız olub. Paytaxt çoxmu dəyişib?

- Düzünü desəm, hələ gəzməmişəm. Sözsüz, 40 il keçəndən sonra yaxşı mənada dəyişikliklər çoxdur. Bakıya ilk dəfə 18 yaşımda gəlmişdim, indi 58-dir artıq. Əsas odur vəziyyət yaxşıya doğru inkişaf edir, gözəlliklər göz oxşayır. Yeganə dəyişməyən buranın insanlarıdır. O vaxt necə qonaqpərvər və gülərüz idisə, bu gün də elədirlər.

- Ailəniz də sizinlədir?

- Təxminən bir həftədən sonra gələcəklər. Hələ ki təkəm.

- Premyer Liqamızı izləyirsiniz?

- Əlbəttə. Buradayamsa və futbol adamıyamsa, baxmalıyam. Dostum Şahin Diniyevin komandası uğurlu çıxış edir. Millini də diqqətdə saxlamağa çalışıram. Əmin olun, “mətbəxin” içindəyəm.

- Gənclik dostlarınızla da görüşürsünüz yəqin.

- Təxminən 10 gün əvvəl bir məclisdəydik. İş elə gətirdi ki, çoxunu orada görə bildim. İsgəndər Cavadov, Maşallah Əhmədov, Asim Xudiyev, Asif Əliyev - əksəriyyət orada idi. Əla fürsət yarandı mənim üçün. Gəncliyimizi yada saldıq, xoş xatirələrimizi bölüşdük.

HƏBİB