Premyer Liqanın 7-ci turunda "Sabah"ın qonağı olan "Kəpəz" turun surpriz nəticəsinə imza atmağı bacardı.
Azər Məmmədovun yetirmələri çətin səfərdə əldə etdikləri bərabərliklə (1:1) aktivlərinə 1 xal yazdıra bildilər.
Bunda mövsümdə ilk matçına çıxan Kamran İbrahimovun əməyi də böyük oldu.
Gənc qapıçı qarşılaşmadan sonra çıxışı və digər suallarla bağlı Sportinfo.az-a müsahibə verib.
- Yaxşı oyun oldu. Yaxşı mübarizə apardıq. Ədalətli nəticədir. Rəqib çox güclü idi. Bir xalı vuruşaraq aldıq.
- Mövsümdə ilk dəfə əsas heyətdə şans qazandın. Həftə ərzində bunu gözləyirdin?
- Bəli, gözləyirdim. Öncədən də bildirilmişdi ki, qarşıdakı görüşə hazır ol. Mən də özümü göstəməyə çalışdım.
- Baş məşqçi mətbuat konfransında bildirdi ki, Kamrandan gözlədiyimdən yaxşı performans gördüm. Özün çıxışını necə qiymətləndirirsən?
- Məncə, yaxşı alındı. Bircə penal epizoduna üzüldüm. Komandanı xilas etməyimə az qalmışdı, alınmadı.
- Kamran, arxada qalan turlardan qəribə tendensiya yaranıb - İddiaları büdrədir, münasib rəqiblərə qarşı isə əziyyət çəkirsiniz. Nədir problem?
- Nəsə səbəb deyə bilmirəm. İnşallah, bundan sonra olmaz.
- Bəlkə, nisbətən zəif rəqiblərlə görüşlərə köklənmədə probleminiz var?
- Yox, elə deməzdim. Sadəcə, səhvlərimizdən erkən qollar buraxırdıq. Davamında da toparlanmaq çətin olurdu.
XANOĞLAN İMANOV
