Premyer Liqanın 31-ci turunda keçirilən “Şamaxı” - “Kəpəz” görüşündə qalib müəyyənləşmədi – 1:1.

Gəncə təmsilçisinin aparıcı fiqurlarından olan nigeriyalı yarımmüdafiəçi Ahmed Ayzaya Sportinfo.az-ın suallarını cavablandırıb.

- Komanda yoldaşların məmnun görünür. Deyəsən, nəticə ürəyinizcə olub.

- Bu cür meydanda oynamaq heç də asan deyil. Süni örtük istər-istəməz oyuna öz təsirini göstərir. Çünki, alışmadığımız haldır. Buna baxmayaraq, əvvəldən sona qədər döyüşərək 1 xal qazandıq. Heç-heçə pis nəticə deyil. Üstəlik, “Şamaxı”nın öz meydanında çox yaxşı mübarizə apardığını da unutmamalıyıq.

- Kənardan 1 xala razı olmağınız açıq-aşkar görünürdü.

- Düzünü desəm, bura qələbə dalınca gəlmişdik. Amma çətinliklərlə üzləşdiyini düşünəndə, 1 xala da şükür etməli olursan. Növbəti matçımız “Sumqayıt”a qarşıdır. İnşallah, qələbə qazanıb, azarkeşlərimizi sevindirərək.

- Bu gün “Zirə”nin sıralarında olmadığına görə məyus deyilsən ki?

- Nə mənada?

- Sabiq komandan avrokuboklara vəsiqə uğrunda mübarizə aparır, yayda Konfrans Liqasında iştirak etmək şansı var.

- Xeyr, məyusluğum yoxdur. Bu gün “Kəpəz”dəyəm və özümü xoşbəxt hiss edirəm. “Zirə”də başıma gələnlərdən heç kimin xəbəri yoxdur. Klubdakılar bilir, bir də mən. Amma bu barədə danışmayacam.

- “Zirə”dən ayrılmaq öz qərarın idi, yoxsa Rəşad Sadıqovun?

- Baş məşqçinin. Aramızda müəyyən şeylər yaşandı. Nə baş verdiyini özləri bilir. Vacib olan odur ki, futbolumu oynayıram, komandama kömək edirəm və xoşbəxtəm.

HƏBİB