"Qarabağ"ın və Azərbaycan U-21 millisinin hücumçusu Musa Qurbanlı Sportinfo.az-a müsahibə verib.

O, yığma komandanın Avropa Çempionatın seçmə mərhələsindəki son matçlarından danışıb.

- Bu gün Norveçlə ağır oyun sizi gözləyir. Matça hazırlıq necə gedir?

- Hazırlıq normal gedir. Oyuna ciddi hazırlaşırıq. Bütün diqqətimizi oyuna cəmləmişik. Fiziki, taktiki və psixoloji cəhətdən oyuna tam hazır olmağa çalışacağıq, inşallah.

- Norveçlə Bakıdakı matçda layiqli mübarizə aparsaz da, sonda 1:2 hesablı məğlubiyyət yaşanmışdı...

- Bəli, həqiqətən də ilk qarşılaşmada oyunumuzda müsbət cəhətlər çox idi. Oyun baxımından bəlkə də rəqibi üstələmişdik. Lakin qələbə qazana bilməmişdik. Bu dəfə həmin oyunu saxlayaraq və səhvləri aradan qaldırmağa çalışacağıq.

- Məsələn, hansı səhvləri?

- Düşünürəm ki, son qərarlarımızı daha da yaxşılaşdırsaq və müdafiədə daha kompakt, diqqətli olsaq yaxşı nəticə də əldə edə bilərik.

- Ardıcıl iki oyunda qol vursan da, son oyunda Finlandiya millisinə qarşı fərqlənə bilmədin. Bu gün susqunluğu poza biləcəksənmi?

- Mənim məqsədim komandama xeyir vermək, qollar vurmaqdır. Və bu gün də bunun üçün əlimdən gələni edəcəm. Əlbəttə, Allah nəsib etsə, fərqlənmək xoş olardı.

- Son oyunda həm də penalla bağlı şanssızlıq yaşamışdın...

- Buna görə çox məyus olmuşdum. Çünki nəticə başqa cür ola bilərdi.

- Məyusluğu üzərindən ata bilmisən, yoxsa psixoloji gərginlik hələ də var?

- Xeyir, gərginlik yoxdur. Hər bir halda Allah hər şeyin ən yaxşısını bilir. Deməli, belə olmalıymış. Allahdan hər zaman xeyirlisini istəyirəm. Buna görə qəlbim rahatdır.

XANOĞLAN İMANOV