"Neftçi"nin yetirməsi olan, ötən mövsüm bu komanda ilə Premyer Liqa çempionluğu yaşayan və bir neçə gün əvvəl "ağ qaralar"dan ayrıldığı rəsmi açıqlanan Kamran İbrahimov Sportinfo.az-a müsahibə verib.
O, "Neftçi"dən ayrılması və gələcək karyerası ilə bağlı suallara aydınlıq gətirib.
- Kamran, yetirməsi olduğun, gənc yaşında çempionluq yaşadığın "Neftçi"dən ayrılmaq çətin olmadı?
- Əlbəttə, çətin oldu. Uşaqlıqdan "Neftçi"də oynayıram. Yeni komandama öyrəşməyim də çətin olacaq. Amma inanıram ki, ən tez zamanda buna uyğunlaşacam.
- Zaman-zaman şans da qazanırdın. Hətta səni "Neftçi"nin gələcəkdə "bir nömrəsi" görənlər də vardı. Amma ayrılmağa qərar verdin. Qalmaq şansın heçmi yox idi?
- Var idi, ancaq özüm qalmadım.
- Maraqlıdır, niyə?
- Çünki az şans qazanırdım. Mənə isə daha çox oynamaq lazım idi.
- Düşünmürsən ki, bir qədər tələsdin? Bəlkə, yeni baş məşqçi həmin şansı sənə verəcəkdi.
- Karyeramı şansa buraxmaq istəmədim.
- Bəs bundan sonrakı karyeranla bağlı nə düşünürsən?
- Yeni komandamda oynayıb, özümü sübut etmək istəyirəm.
- Yeni komanda dediyin "Kəpəz"dir?
- Hələ ki, yox.
- Daha çox oynamaq istəyini bildirdin. Yeni klubunla anlaşmanda bu istəyin əsas rol oynayacağını düşünmək olar?
- Anlaşma deyəndə ki, hər şey özümdən asılı olacaq.
- Özünü Premyer Liqa klubun əsas qapıçısı olmağa tam olaraq hazır sayırsanmı?
- Əlbəttə, hazıram. Öz üzərimdə işləyərək daha yaxşı performans göstərmək üçün əlimdən gələnin artığını edəcəm.
- Kamran, bütün aşağı yaş qrup millilərdə oynamısan. Belə olan halda əsas milliyə də dəvət alacağına ümid edirsən?
- Bəli. Əsas milliyə dəvət almaq üçün əlimdən gələni edəcəm. Məncə, bunu bacaracam.
XANOĞLAN İMANOV