"Səbail"dən ayrılan Ruslan Hacıyev Sportinfo.az-a müsahibə verib.

- Ruslan, karyeranla bağlı son vəziyyət necədir?

- Hazırda gözləməkdəyəm. Hələki heç bir şey yoxdur.

- "Səbail"lə davam etməyinə nə mane oldu?

- Açığı, aramızda danışıq olmadı. Düzdü, "Səbail"də bir müddət oynadım. Aftandil müəllimin mənə çox köməyi oldu. 3 il "Səbail"də, 5 il də "Qarabağ"da onun rəhbərliyi altında oynamışam. 8 ildi bir yerdəyik. Amma indi komandamı dəyişmək istədim.

- Yəni özün də yeni müqavilə bağlamaqda maraqlı olmadın?

- Bəli. Daha yaxşı klubda çıxış etmək və qabağa getmək istəyindəyəm. Karyeramda yeni səhifə açmaq istədim.

- Son mövsüm "Səbail"də oyunun ilə seçilən gənc futbolçulardan idin. Amma indi heç bir təklif almadığını deyirsən. Belə durumla qarşılaşmağın təəccüblü olmadı?

- Azərbaycan futbolu bir qədər fərqlidir. Ona görə də hər an hər şey ola biləcəyini düşünürdüm.

- Təklif olmadıqca özlüyündə klubsuz qalmaq qorxusu yaranırmı?

- Əlbəttə, bu narahatçılıq var. O qədər gənc futbolçumuz var ki, hazırda klubsuzdur. Məncə, bu yaşda klubsuz qalmağım həm özüm, həm də Azərbaycan futbolu üçün pisdir.

- Hazırda formada qalmaq üçün fərdi məşqlər edirsən?

- Bəli, özüm üçün fərdi məşqlər edirəm. Arada da uşaqlarla yığılıb "dır-dır" oynayırıq. Hələki belə davam edirəm.

- Yerli klublardan dəvət almadığını dedin. Bəs ölkə xaricindən çıxış etməç reallığı yaransa getməyə hazırsan?

- Əlbəttə. Mən də ölkə xaricində çıxış etmək istəyirəm. Amma hər hansı təklif və ya danışıq olmayıb. Mən də gözləmə mövqeyində qalıram.

Xanoğlan İmanov