"Bölgədə futbolun inkişafı üçün 5 illik plan hazırlanıb"

1 Yanvar 2021 21:00 Müsahibə 1 161
"Bölgədə futbolun inkişafı üçün 5 illik plan hazırlanıb"

Sportinfo.az xəbər verir ki, 2019-un yayında Naxçıvan Muxtar Respublikasına dönən Əsgər Abdullayev iki ildən artıqdır bölgədə məşqçi kimi fəaliyyətini davam etdirir.

Yerli federasiyanın böyük məşqçisi və eyni zamanda "Araz Naxçıvan”ın çalışdırıcısı olan Abdullayevlə 2021-ci il ərəfəsindəki söhbətimizdə Muxtar Respublikanın futbol həyatına toxunduq, görülən və planlaşdırılan işlər haqda danışdıq.

- Əvvəlcə Naxçıvan futbolunun bugünkü durumu ilə bağlı məlumat verərdiz. Orda "idmanın şahı”nın inkişafı yönündə hansı işlər görülür?

- Onu bildirim ki, qış tətili ərəfəsində "Araz Naxçıvan”ın üzvləri ilə bu gün görüşdüm. Hər bir futbolçuya tətil günləri üçün fərdi hazırlıq planı təqdim olundu, müəyyən tövsiyə və tapşırıqlarımı verdim. Naxçıvanda futbolun sabahı ümidverici görünür. Bu yöndə yerli federasiya rəhbərliyi təqdirəlayiq işlər görür ki, vaxtaşırı mətbuatda bununla bağlı xəbərlər yayılır. Özünüz də bilirsiz ki, avqustdan etibarən Uzunoba kəndinin yaxınlığında, eyniadlı gölün ətrafında yeni baza inşa olunur. Və müəyyən işlər artıq başa çatıb. Federasiyanın təlim-məşq kompleksinin ərazisinə iki tribunadan ibarət süni örtüklü futbol stadionu, üstüörtülü və hasara alınan mini-futbol meydançaları, iki tribunalıq çimərlik futbolu stadionu və inzibati bina daxildi. Eyni zamanda, tribunaların daxilində paltardəyişmə, hakim və həkim otaqları da mövcuddu. Hazırda tikinti meydançasının müxtəlif hissələrində inşaat gedir. İnzibati bina və çimərlik futbolu stadionunda hörgü işləri tamamlandıqdan sonra hər iki tikilinin fasad və interyerinə suvaq çəkilib. Üstüörtülü meydançanın əsasını təşkil edən metal konstruksiyanın quraşdırılması tam yekunlaşıb. Kompleksin ən böyük ərazisini əhatə edən süni örtüklü stadion və mini-futbol meydançası hasara alınıb, su və kanalizasiya xətləri çəkilib. Uzunluğu 96, eni 47 metr olan oyun meydanı üçün süni ot örtüyü artıq hazırdı. Naxçıvan Muxtar Respublikası Gənclər və İdman Nazirliyi ilə Naxçıvan Futbol Federasiyası inşaat işlərinin gedişinə nəzarət edir. Plana əsasən tikinti işlərinin gələn ilin birinci yarısında yekunlaşdırılması nəzərdə tutulub. Bütün bunlar Muxtar Respublikada futbolun inkişafına hesablanan addımdı.

- Bütün bunlara baxmayaraq, Naxçıvan təmsilçisi bu gün nə divizionda, nə də premyer-liqada təmsil olunur. Bu işlər nəyə hesablanıb? Naxçıvanlı azarkeş nə vaxtsa komandasını peşəkar status daşıyan liqalarda görə biləcək?

- Yeni araya-ərsəyə gətirilən baza, mərkəzi stadionda görülən abadlıq işlərinin arxasında, heç şübhəsiz, müəyyən planlar durur. Tikilən yeni baza göz oxşayır. Orda komandaların təlim-məşq toplanışı keçməsi üçün hər cür şərait yaradılıb. Yerli federasiya Muxtar Respublikada futbolun inkişafı üçün əlindən gələni edir və bu məsələdə diqqət və qayğısını əsirgəmir. Ötən il bölgədə futbolun inkişafı üçün 5 illik plan hazırlanıb. Burda istəyirlər ki, inkişaf pillə-pillə olsun. Yəni əvvəlcə yerli kadrlar hazırlansın, infrastruktur baxımından çətinlik olmasın, aşağı yaş qrupları formalaşsın. Ondan sonra Naxçıvan futbolu da ölkənin böyük futbol ailəsinə qovuşsun. Ən sevindirici məqam odu ki, yerli adamların da futbola marağı artıb. Onlar da görülən işlərdən xəbərdardılar, başa düşürlər ki, atılan addımlar boşuna deyil. Bu layihələrin arxasında uzaqqörən siyasət durur. Bu səbəbdən son ildə övladlarını futbol bömələrinə yazdıran valideynlərin sayı artıb, uşaqlar sevə-sevə futbola üz tuturlar.

- Əvvəl də Naxçıvanda çalışmısız, iki ildi də yerli federasiyanın dəvəti ilə Muxtar Respublikadasız. Yerli futbolçuları qısaca necə xarakterizə edə bilərsiz?

- Burdakı uşaqlar xarakteri ilə seçilirlər ki, bu da futbolda heç də sonuncu pillədə olmayan nüansdı. Hər bir idmançıda xarakter olmalıdı. Fərqi yoxdu, o hansı idman növü ilə məşğul olur. Futbolçuda bir çox çatışmazlıqları aradan qaldırmaq mümkündü. Uzağı həmin çatışmazlıqları məşqlərdən sonra qalıb işləməklə aradan qaldırmaq olar. Ancaq xarakter... Bu insanın qanında olmalıdı ki, burdakı futbolçuların əklsəriyyətində var. Bu da məni sevindirir.

- Hazırda Naxçıvanda daxili çempionat keçirilir?

- Pandemiya üzündən burda da çempionat dayanıb. Bildiyiniz kimi, Naxçıvan təmsilçisi Region Liqasında mübarizə aparır. Daxili çempionatda qalib olan komanda birbaşa liqanın yarımfinalına vəsiqə qazanır. Region Liqası bəlli səbəbdən keçirilmədiyindən yarışlar təxirə salınıb. Buna baxmayaraq, məşqləri davam etdiririk.

- Çempionat keçirilməyən Naxçıvanda qalmaq sizi darıxdırmır?

- Niyə darıxmalıyam ki?! Çempionat olmasa da, yenə deyirəm, məşqlər davam edir. Bu gündən etibarən komanda üzvlərinə müəyyən müddətə istirahət veriləcək. Ondan sonra yenə iş başında olacağıq. Müxtəlif yaş qruplarına gəlincə, AFFA-nın bayrağı altında keçirilən liqalarda çempionat olmadığından burda da yarışlar müvəqqəti dayanıb. Bakıda və Azərbaycanın başqa zonalarında yarışlar başlayan kimi, Naxçıvanda da futbol həyatı yenidən qaynayacaq.

- Naxçıvanlı futbolçuların mübariz xarakterə malik olduğunu qeyd etdiz. Ancaq nə aşağı yaş qrupu üzrə millilərdə, nə də U-21 və əsas yığmada Naxçıvan futbol məktəbinin yetirməsinə rast gəlmək olar. Əslən naxçıvanlı futbolçular var, ancaq sırf o məktəbin yetirməsi yoxdu. Bu nədən irəli gəlir?

- Bu yaxınlarda Bakıya səfərim zamanı bir futbolçumuzu aşağı yaş qrupu üzrə yığmaların birinə təklif etdim. Ancaq qarşı tərəfdən reaksiya olmadı. Bilirsiz, necədi? Yığmanı çalışdıran məşçqçilər bölgələrə də diqqət ayırmalıdılar. O vaxt Valeri Lobanovski Kolotov soyadlı futbolçunu birinci dəstədən Kiyev "Dinamo”suna cəlb etmişdi və seçimində də yanılmamışdı. İndikilər hər şeyi burnunun ucunda axtarır, Bakıdan kənara çıxmırlar. Bəli, Naxçıvanda çox sayda perspektivli və gələcək vəd edən gənclər, yeniyetmələr var. Sadəcə, onları görmək və yığmanın düşərgəsinə dəvət etmək lazımdı. İnşallah, gələn il keçirəcəyimiz yerli çempionat oyunları ilə bağlı müəyyən fikirlərimiz var. Yığma məşqçilərini bizm oyunları izləməyə dəvət etməyi düşünürük. Ya onlar gəlib daxili çempionatı yerində izləsinlər, ya da biz perspektivini gördüyümüz uşaqları yoxlanış üçün Bakıya göndərək. Naxçıvan Gənclər və İdman Nazirliyi, yerli Futbol Federasiyası futbolun inkişafı üçün əməli işlər görürlər. Hazırlanan və həyata keçirilən 5 illik plan sayəsində tezliklə bölgədə hansı işlər görüldüyünün şahidi olacaqsız. Naxçıvan elə bir yerdi ki, burda qarşıya məqsəd qoyuldusa, çətinə-asana baxmadan yüz faiz yerinə yetiriləcək. Çünki burda işləməyi bacarırlar. Muxtar Respublikada futbolu həqiqətən çox sevirlər. Bu sevgi sayəsində də çox şeyə nail olmaq mümkündür (Futbol+).

Digər Xəbərlər
Xəbər Lenti