"Kimisə sifarişlə götürməyim mümkün deyil" - MÜSAHİBƏ

11 Oktyabr 2019 21:52 Azərbaycan Futbolu 908
"Kimisə sifarişlə götürməyim mümkün deyil" - MÜSAHİBƏ

Azərbaycan millisinin sabiq baş məşqçisi, hazırda Region Liqasının yeni mövsümünə hazırlaşan "Araz-Naxçıvan"ın baş məşqçisi Əsgər Abdullayev Sportinfo.az saytına müsahibə verib.

- Əsgər müəllim, işləriniz necə gedir?

- Sağ olun, normaldır.

- Naxçıvana gedəndən sonra sanki "kölgə"yə çəkilmisiz.

- Mən elə Bakıda olanda da "kölgə"də idim (gülür).

- Naxçıvanda konkret məqsədiniz, planınız nədir?

- Əsas məqsəd Muxtar respublikada uşaq futbolunun, ümumi futbolun inkişafıdır.

- "Araz-Naxçıvan"ın diviziona, Premyer Liqaya çıxmaq ehtimalı var?

- Məncə, hə.

- Nə qədər realdır?

- Təbii ki, bu sual rəhbərliyə aiddir. Mən biləni, belə bir plan var. Allahın köməyilə yaxşı olar. Naxçıvanın Azərbaycan futbolunda yaxından iştirakı planda var.

- Gənclər və İdman idarəsi, yaxud şəhər rəhbərliyi səviyyəsində kiminləsə bir görüşünüz olub bu barədə?

- Bu haqda klub rəhbərliyi ilə söhbətimiz olub.

- Ümumiyyətlə, rəhbərlik yenidən böyük futbola qayıtmağa can atır?

- Bəli, belə bir düşüncələri var.

- Əsgər müəllim, 30 ilə yaxındır məşqçi işləyirsiz. Milli komandadan tutmuş klublara qədər - əksəriyyətində çalışmısız. Geriyə boylananda Azərbaycanın ovaxtkı futbolu ilə indikini necə müqayisə edə bilərsiz?

- Bu istiqamətdə hərənin şəxsi fikri var. Məncə, o vaxt milli komanda daha yaxşı idi.

- Belə fikir formalaşıb ki, köhnə dönəmlə indiki vaxtın arasındakı Azərbaycan futbolunda yalnız böyükhesablı məğlubiyyətlər azalıb, daha 5-6 top fərqilə uduzmuruq, vəssalam.

- O vaxt kimlərə uduzurduq ki, 5-6 top fərqiylə?

- Portuqaliyaya, Polşaya, Serbiyaya, Ukraynaya və.s

- Bunu əldə bayraq edib gəzdirmək olmaz. Fikrimi dedim, ovaxtkı milli komandada daha yaxşı, səviyyəli futbolçular var idi, nəinki indi. İndi də yaxşı oyunçularımız var, amma çox az, barmaqla saymaq olar.

- Nəzərə alsaq ki, əvvəlki illərlə müqayisədə indi Azərbaycan futbolunda pul dəfələrlə çoxdur, maliyyə vəziyyəti yaxşıdır, o zaman bu geriləmənin, yaxud yerində saymanın səbəbi nədir?

- Pulla olsaydı, ərəblər hər dörd ildən bir dünya çempionu adını qazanardılar. Əsas pul deyil, işdən söhbət gedir.

- Son dönəmlər AFFA rəhbərliyi veteran futbolçu-məşqçiləri başına yığır. Sizə bu barədə müraciət edilib?

- Yox, mənə müraciət olunmayıb.

- Millinin oyunlarını izləyirsiz?

- Əlbəttə, baxmalıyıq. İzləyirəm.

- Qarşıda Macarıstanla çətin səfər oyunu var. Nə gözləyək?

- Bizim üçün asan oyun gözlənilmir. Çox çətin olacaq.

- Aşağı yaş qrupu üzrə millilər də bərbad vəziyyətdədir. Siz bir çıxış yolu bilirsiz?

- Çıxış yolu budur ki, işi bilənə vermək lazımdır.

- Veteran futbolçu Nazim Süleymanov Həmkarlar Təşkilatı yaradıb. Əksər veteranlar buna qarşı çıxıb.

- Mənə elə gəlir ki, veteran futbolçular bir olmalıdırlar. Əgər bir nöqtəyə vursalar, bunun Azərbaycan futboluna xeyiri də olar.

- Sizcə, Azərbaycanda klub və ya milliyə nə vaxt əcnəbi məşqçi uğur qazandıracaq, ümumiyyətlə qazandıra bilər?

- Sözün açığı, mənim üçün məşqçi məsələsində yerli-legioner fərqi yoxdur. Futbol həyatında belə şeylər normaldır. Əsas olan nədir, əgər əcnəbi yüksək səviyyəli məşqçidirsə, yan-yörəsində yerli futbolçular olmalıdır. Əgər gələn əcnəbi məşqçinin köməkçiləri də legioner olacaqsa, heç nə əldə edə bilməz. Yerlilər də onlardan nəsə baxıb götürməlidir, öyrənməlidir.

- Yenidən Azərbaycan millisində işləmək imkanınız olsa, nəticə verə bilərsiz? Özünüzdə bu gücü hiss edirsiz?

- İnsan təcrübəsini artırdıqca daha çox güclü olur. Məsələn, əvvəlki səhvlərimi indi eləməzdim. Əlbəttə, söhbət nəticə verib-verməməkdən getmir. Məsələ budur ki, indi 3 il əvvəlkindən daha təcrübəliyəm.

- Yəni, indi daha çox xeyir verə bilərsiz.

- Mən belə fikirləşirəm. Bizdə belədir, futbolçu 16-17 yaşında cavandır, 28-29 yaşında qocadır. Məşqçi də 45-50-yə çatdısa, demək ki, onunku qurtardı. Bu, düzgün yanaşma deyil. Belə bir məsəl var, Allahsız yerdə otur, böyüksüz yerdə oturma. İnsan yaşlandıqca daha aqil olur. Məşqçiləri tez-tez dəyişməklə uğur qazanmaq olmaz.

- Misal üçün, sizi hər hansı bir milli komandamıza baş məşqçi qoydular və tapşırıqla futbolçu götürməli olduğunuzu bildirdilər.

- Siz yəqin ki, məni yaxşı tanımırsız, ona görə bu sualı verirsiz.

- Bəli, yaxşı tanımıram, yaşım azdır.

- O sual mənə aid deyil. Kimisə sifarişlə götürməyim mümkün deyil. Bu, restoran deyil ki, kimisə "zakaz" eləsinlər. Məndə elə şey heç vaxt olmayıb, ola da bilməz.

Elvin

Digər Xəbərlər
Xəbər Lenti
12 İyul 21:40 Pepdən UEFA-ya mesaj
12 İyul 15:00 Boşanırlar - FOTOLAR
12 İyul 00:00 Biabır oldular - VİDEO
11 İyul 21:40 Ən yaxşı 5... - VİDEO