“Qarabağ” Konfrans Liqasının 3-cü təsnifat mərhələsində Kiyev “Dinamo”su ilə ilk oyuna bu gün çıxacaq.

Rəqib Çempionlar Liqasından üzüaşağı yuvarlana-yuvarlana gəlib.

Ümumi vəziyyəti heç də yaxşı deyil. Yeni avrokuboklar mövsümünün dörd oyununda da məğlubiyyətlə üzləşiblər.

Müdafiə keçidləri
Kiyev klubunun ən böyük problemlərindən biri hücumdan müdafiəyə keçiddir. Komanda topa sahib olduğu zaman cinah müdafiəçiləri irəli çıxır, yarımmüdafiəçilər isə rəqib meydanında yerləşirlər.

Top itkisindən sonra ilk əks-pressinq uğursuz olarsa, müdafiə xətti geniş sahədə rəqiblə qarşı-qarşıya qalır.

“Qarabağ”ın bu boşluqlardan istifadə etmək üçün topu qazandıqdan sonra ilk ötürməni avtomatik olaraq geriyə verməməsi vacibdir. İlk seçim mümkün qədər irəli olmalıdır.

Lakin bu, düşünülməmiş uzun ötürmə demək deyil. “Qarabağ” iki və ya üç qısa ötürmə ilə pressinqdən çıxaraq daha sonra boş cinaha keçid etməlidir.

Topla sürətli hərəkət edə bilən futbolçular “Dinamo”nun cinah müdafiəçilərinin arxasında yaranan sahələrdən istifadə edə bilərlər.

Mərkəz müdafiəçilərinin arxasındakı sahə

“Dinamo” topa nəzarət etdiyi zaman müdafiə xəttini irəli çıxarır.

Kristian Bilovar, Taras Mixavko və Tomaş Kendziora kimi müdafiəçilər topa qarşı aqressiv çıxırlar. Lakin onların arxasına vaxtında ötürmə verildikdə komanda geri qaçmaq məcburiyyətində qalır.

“Qarabağ” hücumçusunu yalnız mərkəz müdafiəçiləri arasında uzun ötürmə gözləməyə məcbur etməməlidir.

Daha effektiv variant hücumçunun geri çəkilməsi, mərkəz müdafiəçisini özü ilə aparması və cinahdan və ya yarımmüdafiədən üçüncü futbolçunun həmin boşluğa qaçmasıdır.

Ön xətdə çıxış edəcək digər oyunçu topu ayağına qəbul etdikdən sonra onu qoruyaraq və ya arxadan qoşulan futbolçuya ötürə bilsə, “Qarabağ” rəqib müdafiəsini hərəkətsiz vəziyyətdə yaxalaya bilər.

Müdafiədə fərdi və mövqe səhvləri

“Dinamo” PAOK-la ilk oyunda 2:3, cavab qarşılaşmasında isə 0:2 hesabı ilə məğlub oldu. İlk görüşdə Kiyev klubunun futbolçuları da müdafiədə soyuqqanlılığın çatmadığını etiraf etmişdilər.

Bu nəticələr “Dinamo”nun müdafiə strukturunun təzyiq altında tam sabit olmadığını göstərir.

PAOK-la ilk matçda “Dinamo” oyunun 3-cü dəqiqəsində hesabı açsa da, sonradan üç qol buraxdı. Bu, komandanın üstünlük əldə etdikdən sonra belə oyunu nəzarətdə saxlamaqda çətinlik yaşaya bildiyini göstərir.

“Qarabağ” erkən qol buraxsa belə, strukturunu pozmamalıdır. Eyni zamanda Ağdam klubu hesabı açarsa, tamamilə müdafiəyə çəkilməməli, rəqibin müdafiədəki qeyri-sabitliyindən istifadə etməyə davam etməlidir.

SPORTİNFO.AZ