U-17 çempionatına start verilib.

İlk turun proqramındakı ən diqqətçəkən qarşılaşması iki aparıcı akademiyanın - “Qarabağ” və “Sabah”ın görüşü idi.

“Qarabağ” öz meydanında “Sabah”ı qəbul edirdi. Biz də qarşılaşmanı yerində izlədik.

İlk diqqətimizi çəkən məqamlardan biri “Sərhədçi” İdman Kompleksindəki meydançanın vəziyyəti oldu. Meydanç

nın kifayət qədər intensiv istifadə olunduğu açıq şəkildə hiss olunurdu. Qarşılaşmadan əvvəl burada “Qarabağ”ın U-19 komandasının məşqini də izləmişdik və meydanın gün ərzində ciddi yüklənməyə məruz qaldığı görünürdü.

“Sabah”ın aktiv başlanğıcı

Komandalar oyuna kifayət qədər dinamik başladılar. İlk dəqiqələrdə təşəbbüs daha çox “Sabah”ın tərəfində idi. “Sabah” topa daha çox nəzarət edir, hücumları daha ardıcıl qurmağa çalışırdı. Bu üstünlük çox keçmədən nəticəsini verdi. “Sabah” standart vəziyyətdən istifadə edərək hesabı açdı, 0:1.

Lakin ilk hissənin sonlarına doğru oyunun xarakteri dəyişməyə başladı. “Qarabağ” təşəbbüsü öz üzərinə götürdü və “Sabah”ın müdafiəsini daha ciddi təzyiq altında saxlamağa başladı.

Buna baxmayaraq, qonaq komandanın müdafiə xətti bir neçə epizodda olduqca etibarlı oynadı. Bəzi təhlükəli anlarda isə qapıçı özünü yaxşı tərəfdən göstərdi.

İkinci hissədə “Sabah”ın da müəyyən imkanları oldu. Lakin ümumi mənzərə dəyişmədi: oyunun təşəbbüsü tədricən və daha qabarıq şəkildə “Qarabağ”ın tərəfinə keçdi.

Samir Musayevin komandası son 10-15 dəqiqədə xüsusilə ciddi təzyiq yaratdı. Hücumlar ard-arda gəlirdi, “Qarabağ” hesabı bərabərləşdirmək üçün bütün gücü ilə irəli atılmışdı.

Samir Musayevin özü Azərbaycan futbolunda kifayət qədər tanınmış simadır. Keçmiş hücumçu uzun illər “Qarabağ” forması geyinib və 2003/04 mövsümündə Azərbaycan çempionatının bombardiri olub. Hazırda isə “Qarabağ” U-17 komandasının baş məşqçisidir.

Ən böyük üstünlüyü - Oyun intizamı

Amma qarşılaşmada bizim üçün ən maraqlı məqamlardan biri “Sabah”ın oyun intizamı və qərarvermə keyfiyyəti oldu.

Bəzi epizodlarda komandanın oyunu artıq uşaq futbolundan daha çox böyüklər futbolunu xatırladırdı.

Oyunçuların nə zaman risk etməli, nə zaman sadə oynamalı olduqlarını yaxşı seçməsi, müdafiə zamanı kompakt qalması və hesabı qorumaq üçün düzgün qərarlar verməsi diqqət çəkirdi.

Xüsusilə son dəqiqələrdə “Qarabağ”ın təzyiqi artmasına baxmayaraq, “Sabah” futbolçuları panikaya düşmədilər. Komanda müdafiədə kifayət qədər ağıllı və intizamlı oynadı.

Bu məqamı ayrıca qeyd etmək lazımdır: U-17 futbolunda təkcə texniki keyfiyyət yox, oyunu oxumaq və düzgün qərar vermək bacarığı da inkişafın mühüm göstəricisidir.

“Sabah”ın qapıçısı da qarşılaşmada müsbət təəssürat yaratdı. Bəzi epizodlarda iki səhvi olsa da, ümumi olaraq yaxşı oyun keçirdi. Xüsusilə ayaqla oynama keyfiyyəti diqqət çəkirdi.

Müasir futbolda qapıçının yalnız qapını qoruyan oyunçu yox, komandanın ilk hücum qurucularından biri olması nəzərə alınarsa, bu detal əhəmiyyətlidir.

Digər diqqətçəkən məqam “Sabah”ın fiziki vəziyyəti idi.

90 dəqiqə ərzində komandanın intensivliyini qoruması, ikili mübarizələrdə rəqabət aparması, sürətlənmə və istiqamət dəyişmələrində aktiv qalması komandanın matça yaxşı fiziki hazırlıqla gəldiyini göstərirdi.

Təbii ki, bir oyuna əsasən komandanın bütün mövsüm üçün fiziki hazırlığı barədə yekun nəticə çıxarmaq olmaz.

Bunun üçün daha çox matç və performans göstəricilərinə baxmaq lazımdır. Amma ilk oyun baxımından “Sabah”ın fiziki hazırlığı müsbət təəssürat yaratdı.

Nəticə

“Qarabağ” son dəqiqələrdə hesabı dəyişmək üçün çox ciddi səy göstərsə də, “Sabah” müdafiədə soyuqqanlılığını qorudu və oyunu 1:0 hesablı qələbə ilə başa vurdu.

İlk tur üçün bu, kifayət qədər maraqlı qarşılaşma oldu. Bir tərəfdə oyunun son bölümündə böyük təzyiq yaradan “Qarabağ”, digər tərəfdə isə hesabı qorumağı bacaran, intizamlı və fiziki baxımdan hazırlıqlı “Sabah”.

U-17 mövsümünün ilk turunda iki aparıcı akademiyanın qarşılaşması bizə ən azı bir şeyi göstərdi: bu yaş qrupunda nəticə qədər oyunçuların qərarverməsi, taktiki intizamı, fiziki hazırlığı və böyüklər futboluna yaxınlaşan davranışları da izlənilməlidir.

Mövsümün ilk böyük akademiya duelindən isə qalib ayrılan tərəf “Sabah” oldu.

SPORTİNFO.AZ