Azərbaycanı Tokio Olimpiadasında üçtəkanla uzunluğa tullanma yarışında təmsil edən Nazim Babayev çıxışını başa vurub.
2 dəfə Dünya Universiadasının, 2017-ci ildə İslam Həmrəylik Oyunlarının çempionu olan istedadlı atlet təəssüf ki, olimpiadada pərəstişkarlarına xoş sürpriz edə bilməyib.
Nazim üçtəkanla 16,72 metr tullanaraq təsnifat mərhələsində 32 iştirakçı arasında 15-ci olub. Final mərhələsinə isə ilk 12 sırada yer alan atletlər vəsiqə qazanıb.
Bununla da Tokio-2020-də çıxışını başa vuran idmançılarımızın sayı 30-a çatıb. Onlardan yalnız ikisi bürünc medal qazanıb: İrina Kindzerska (cüdo) və Alfonso Dominges (boks).
SPORTİNFO.AZ