“Millinin toplanışında olub-olmayacağımı deyə bilmərəm.
Mən “Qəbələ”də üzərimə düşəni etməyə çalışıram, qərarı baş məşqçi verir”.
Bu sözləri Sportinfo.az-a açıqlamasında Azərbaycan millisinin qarşıdakı oyunları ilə bağlı danışan Səlahət Ağayev deyib.
Əvvəlki illərdə yığmaya hansı qapıçıların dəvət alacağı öncədən məlum olurdu. Komanda sayının az olması, üstəgəl, bəzi komandalarda “çərçivə”ni əcnəbilərin qoruması diqqətlərin konkret 2-3 nəfərin üzərinə yönəlməsi ilə nəticələnirdi.
İndiki durum fərqlidir. Bu gün yığmaya namizəd göstərilən qolkiperlərin sayı kifayət qədərdir: Şahruddin Məhəmmədəliyev, Emil Balayev, Mehdi Cənnətov, Səlahət Ağayev, Aqil Məmmədov və s. Mütləq ki, bu adlardan ikisi kənarda qalacaq.
Səlahət məlum vəziyyətdən xəbərdar olduğunu, bu halın Azərbaycan futboluna fayda verəcəyini bildirib:
“Veriləcək qərara hörmətlə yanaşmaq borcumdur. Dəvət edər, can-başla əlimdən gələni edərəm, etməz, gələcəyə baxarıq.
Bu gün çempionatda sevindirici hallardan biri yerli qapıçıların daha çox şans qazanmasıdır. Demək olar bütün komandaların qapısını azərbaycanlı qapıçılar qoruyur.
Bu hal millinin məşqçiləri üçün də olduqca yaxşıdır. Kamran Ağayevin seçim imkanı genişdir. Namizədlər arasında götür-qoy etdikdən sonra seçim edəcəklər”.
Azərbaycan seçməsi Millət Liqası çərçivəsində növbəti oyunlarını bu ay keçirəcək. Sentyabrın 22-də Trnavada Slovakiyanın qonağı olacaq milli, 3 gün sonra “Dalğa Arena”da Qazaxıstanla qarşılaşacaq.
HƏBİB