"Çox maraqlı oyun alındı. Hər iki komandanın futbolçuları alqışa layiq idi. Oyunçularımı təbrik edirəm.

Düşündüyümdən daha yaxşı oynadılar. Uzun müddətdir ki, çempionatda bu qədər azarkeşin qarşısında oynamırdıq. Meydanda əsl futbol gördük".

Sportinfo.az xəbər verir ki, bu fikirləri "Qarabağ"ın baş məşqçisi Qurban Qurbanov "Neftçi"yə 2:1 hesabı ilə qalib gəldikləri Premyer Liqanın III tur oyunundan sonra mətbuat konfransında deyib.

49 yaşlı mütəxəssis bildirib ki, çempionatda fasilənin yaranması futbolçunun formasına təsir edir: "Çoxdandır birlikdə oynamamışdılar. Bu gün qərar verdim ki, onlar birlikdə olsun. İstər-istəməz yorğunluq olur. Oyunçular matçdan əvvəl bir dəfə normal məşq etmişdilər".

Qurbanov Konfrans Liqasının I turunda Bakıda qarşılaşacaqları İsveçrə "Bazel" ilə oyun haqqında da danışıb: "Bazel"lə oyunda futbolçular daha yaxşı ola bilər. Bu gün meydança ağır idi. Bu məni bir az narahat edir".

Təcrübəli baş məşqçi rəqibin görüşün sonlarında daha çox irəli atıldığını sözlərinə əlavə edib:

"Əks hücumlara çıxsaq da, sonluq yaxşı alınmadı. Toral Bayramov yorulmuşdu, ona görə narahat oldum. Çatışmazlıqlar var. Səhvlər olanda bəzən sevindirici olur. Belə olan halda futbolçuları ələ almaq mümkündür".

Mütəxəssis iki qol vuran İbrahima Vadji haqqında bunları diqqətə çatdırıb: "O, fərqli çempionatdan gəlib. Çox istəkli futbolçudur. Meydanda sonadək mübarizə aparır.

Ona alqış düşür. "Neftçi"nin müdafiəsini təzyiqdə saxladı. Məşqlərdə çox istəklidir. Bəzi çatışmayan cəhətləri var. Ustalıq səviyyəsini daha da yaxşıllaşdıracağına inanıram". (Report)