"Oyuna yuxulu şəkildə başlamağımız təəssüf doğurur. Lazımsız qol buraxdıq. Bu, qarşılaşmanın sonunda bizə baha başa gəldi".
Sportinfo.az xəbər verir ki, bu fikirləri "Aşdod"un qapıçısı Yoav Gerafi evdə "Qarabağ"a 0:1 hesabı ilə uduzduqları Konfrans Liqasının II təsnifat mərhələsinin cavab matçından sonra deyib.
28 yaşlı qolkiper mərhələdə adlaya bilmədikləri üçün təəssüfləndiyini söyləyib: "Onları keçə biləcəyimiz barədə nikbin idik. İlk qarşılaşmadan sonra rəqibin qorxunc olmadığını gördük".
Gerafi daxili çempionata köklənəcəklərini sözlərinə əlavə edib. O, "Aşdod"un yaxşı oyunçulara malik olduğunu vurğulayıb:
"Heyət çox gəncdir. Bəzi futbolçular avrokubokda ilk oyunlarına çıxdı. Bu mövsüm daha yaxşı komanda olacağımıza inanıram".
Bakıdakı ilk görüşdə rəqibi ilə qolsuz heç-heçə edən "Qarabağ" III təsnifat mərhələsində Kiprin AEL (Limassol) klubu ilə qarşılaşacaq.
İlk matç avqustun 5-də səfərdə, cavab oyunu avqustun 12-də evdə gerçəkləşəcək.