«Neftçi» öz yetirməsini geri qaytarmaq istəyir.
Klubdan Sportinfo.az-a daximl olan məlumata görə, yeni transfer planı Araz Abdullayevlə bağlıdır.
Hazırda «Qarabağ»a məxsus olan yarımmüdafiəçi yayda sərbəst qalmalıdır. Bakılılar onu sərbəst agent statusu ilə düşərgəyə dönməsində maraqlıdır.
Yarımmüdafiəçi 2012-2016-cı illərdə «Neftçi»nin əsas komandasının formasını geyinib. 2017-ci ildə 200 min manat qarşılığında «Qəbələ»yə satılıb. Əyalət təmsilçisi isə onu 6 ay sonra Kipr klubuna – «Anortosis»ə icarəyə verib.
27 yaşlı futbolçu 2018-ci ildə «Panionis»lə müqavilə bağlayıb, lakin Yunanıstanda çox qalmayıb: kontrakta imza atandan bir neçə gün sonra «Qarabağ»a gəlib.
Qurban Qurbanov ötən müddət ərzində ona kifayət qədər şans tanıyıb. Fəqət Arazın təcrübəli mütəxəssisin ümidlərini doğrultduğunu deyə bilmərik. Odur ki, Ağdam klubunda əsas heyət üzvü sayılmır.