SOCAR və «Neftçi» rəhbərlikləri arasında toplantı keçiriləcək.
Görüşdə klubun cari mövsümdəki çıxışı müzakirəyə çıxarılacaq. Neft şirkəti uğursuz nəticələrdən dolayı səlahiyyətli mənsublardan hesabat tələb edib.
Qarşıdakı yığıncaqdan çıxacaq nəticələr böyük maraqla gözlənilir. Ən böyük ehtimal budur ki, klubda struktur və kadr islahatı aparılacaq. «Neftçi»yə kurasiyanın Zaur Qəhrəmanovdan alınacağı barədə xəbərlər almaqdayıq.
Onun da daxil olduğu Müşahidə Şurasının ləğvi, yaxud üzvlərinin dəyişdirilməsi istisna edilmir. Qəhrəmanova, həmçinin AFFA-ya bağlı kadrların «Neftçi» ilə vidalaşması güman olunur.
Həllini gözləyən digər məsələ baş məşqçi postu ilə bağlıdır. Dünən Qəbələdə «Neftçi» azarkeşlərinin ünvanına ağır tənqidlər səsləndirən Samir Abasovun vəzifəsindən gedəcəyi demək olar bəllidir.
Qalır onu yerli, yoxsa əcnəbi həmkarının əvəzlənməsinin müəyyənləşməsi.
SOCAR komandanın azərbaycanlı mütəxəssislərdən birinə tapşırlmasını istəyir, namizədlərin siyahısını da tərtib ediblər. «Neftçi»nin idarəçiləri isə sükan arxasına xarici gətirmək üçün çalışır.
SPORTİNFO.AZ