Sportinfo.az xəbər verir ki, müdafiə sənayesi naziri, Azərbaycan Velosiped İdmanı Federasiyasının prezidenti Mədət Quliyev Respublika Velotrekində müxtəlif yaş qrupları üzrə yığma komandaların üzvləri ilə görüşüb.

İdmançıları qarşıdan gələn 31 dekabr – Dünya azərbaycanlılarının Həmrəyliyi Günü və Yeni il münasibətilə təbrik edən federasiya prezidenti bildirib ki, velosipedçilərin beynəlxalq yarışlarda uğur qazanması, ölkəmizi layiqincə təmsil etməsi üçün lazım olan bütün işlər görüləcək və maddi-texniki təminat daha da yaxşılaşdırılacaq.

Ölkəmizdə idmana göstərilən dövlət qayğısından danışan Mədət Quliyev bildirib ki, Azərbaycan Respublikasının Prezidenti, Milli Olimpiya Komitəsinin rəhbəri, bu gün 60 illik yubileyini Hadrut qəsəbəsində qeyd edən cənab İlham Əliyev sağlam gəncliyin yetişməsi üçün hər zaman dəstək göstərir.

Federasiya rəhbəri Beynəlxalq Velosipedçilər İttifaqının prezidenti David Lappartyen və Avropa Velosipedçilər Birliyinin prezidenti Enriko Della Kasanın Azərbaycan Prezidentinə məktub ünvanlayaraq onu 60 illik yubileyi və yenidən Milli Olimpiya Komitəsinin prezidenti seçilməsi münasibətilə təbrik etdiklərini də xüsusi vurğulayıb.

“Özünüzə inanın, vahid bir komanda olun. Sizi təkcə yaxşı velosipedçi yox, həm də Vətənimizin layiqli vətəndaşı kimi görmək istəyirik”, - deyən Mədət Quliyev bu cür görüşlərin tez-tez təşkil ediləcəyini bildirib.

Yığma komandanın baş məşqçisi Asif Həsənov və Elit yığma komandamızın kapitanı Elçin Əsədov səmimi görüşə görə federasiya prezidentinə təşəkkür edərək rəqabətə davamlı, güclü komanda formalaşdırılması üçün bütün qüvvələrin səfərbər ediləcəyini deyiblər.