"Yenidən Niderlanda qayıtdığım üçün şadam".
Sportinfo.az xəbər verir ki, bu fikirləri Azərbaycan millisinin və "Sabah"ın futbolçusu Ozan Can Kökçü "NH Sport" nəşrinə açıqlamasında icarə əsasında "Telstar"a keçidi barədə danışarkən deyib.
Türkiyə əsilli yarımmüdafiəçi sözügedən komandanı seçməsinin səbəbini açıqlayıb. 23 yaşlı oyunçu bunu "Telstar"ın əla futbol sərgiləməsi ilə əlaqələndirib:
"Keyfiyyətli komandaya gəlmişəm. Gənc yaşlarımda Niderlanda oynadığım üçün bu klubu yaxşı tanıyıram. Burada maraqlı 6 ay keçirəcəm".
"Sabah" Ozan Can Kökçünu "Telstar"a mövsümün sonunadək icarəyə verib. Kökçü yenidən Niderland çempionatında çıxışının onun inkişafına müsbət təsir edəcəyini vurğulayıb:
"Öz klubumda da şans qazanırdım. Amma yenidən buradakı meydançalarda oynamaq üçün "Telstar"ı seçdim. Düşünürəm ki, çempionatın səviyyəsi yüksəkdir və bu, mənim inkişafıma kömək edə bilər. Bu komandaya keçmək düşünülmüş addım idi".