«Oğlum müharibənin ilk günlərindən cəbhə xəttindədir və mən onunla fəxr edirəm».
Bu sözləri Sportinfo.az-a açıqlamasında İskəndər Cavadov adına Bakı Futbol Akademiyasının vitse-prezidenti Yaşar Seyidov deyib.
Tanınmış futbol adamının oğlu Valeh Seyidov 1 aydan rtıqdır Azərbaycan Ordusunun sıralarındadır. Könüllü olaraq silaha sarılan gənc hazırda ermənilərə qarşı vuruşur: «Valehlə tez-tez əlaqə saxlamaq olmur.
Ona nə vaxt icazə verilirsə, onda da danışırıq. Bizə hər şeyin yaxşı olduğunu deyir. Dönə-dönə tapşırır ki, məndən narahat olmayın, hər şey qaydasındadır.
O, hələ müharibədən qabaq orduya könüllü yaxzılmışdı. Müharibə başlayanda, gəlib dedi ki, «ata, dostlarımın bir çoxu hərbiyə yollanıb, mən də gedirəm». İnşallah, hamısı sağ-salamat geri qayıdar.
Ordumuz çox güclüdür. Şübhəm yoxdur ki, ermənilər üzərində qələbə qazanacağıq və tezliklə müharibə bitəcək. Vaxtilə Valeh Azərbaycanın ən perspektivli futbolçularından sayılırdı.
Bəzi insanlar imkan vermədi ki, o, futbolda sözünü desin. Qarşısını çox tez kəsdilər. İndi isə Valeh sözünü döyüş bölgəsində deyir. Onu heç kim məcbur etmədi buna.
Sadəcə, içindən gəldi, ali təhsilini yarımçıq buraxıb cəbhəyə getdi. Çünki o, mənim oğlumdur, əsl vətənpərlik hissi onun damarındakı qandan axır».