“Oyunları azarkeşsiz keçirmək və TV-də yayımlamaq daha yaxşıdır. Bu, insanların ehtiyac duyduğu və istədiyi şeydir, futbol evlərinə müsbət enerji gətirir”.
Sportinfo.az xəbər verir ki, bu fikirləri UEFA-nın prezidenti Aleksander Çeferin ZDF telekanalına açıqlamasında bildirib.
Sloveniyalı funksioner deyib ki, koronavirus pandemiyasına görə dünyada və xüsusən Avropadakı vəziyyəti izləyirlər: “Avrokuboklar iyul və ya avqust aylarında ola bilər. Sentyabr və ya oktyabrda oynaya bilmərik”.
Çeferin mövsümün ləğv olunması barədə suala belə cavab verib: “Səlahiyyətli qurumlar bizə oynamaq üçün icazə vermirsə, oynaya bilmərik”.
Belarus çempionatı istisna olmaqla, UEFA bayrağı altında keçirilən bütün yarışlar koronavirus pandemiyası ilə əlaqədar dayandırılıb. Matçların yaydan tez bərpa olunmayacağı gözlənilir.