Dünən məlum oldu ki, 23 yaşadək futbolçulardan ibarət Azərbaycan millisi yaradılmayacaq.
Biz bunu rəsmi ağızdan - AFFA-nın icraçı vitse-prezidenti və baş katibi Elxan Məmmədovdan eşitdik.
“Azərbaycan Radio”sunun qonağı olan federasiya rəhbəri bildirdi ki, U-23 yığmasının yaradılması ilə bağlı Məşqçilər Komitəsinin təklifi qəbul edilməyib:
“AFFA İcraiyyə Komitəsində belə bir fikir səslənmişdi. Ancaq bu təklif təsdiqlənmədi. Mənim fikrimi soruşursuzsa, buna ehtiyac yoxdur. Çünki həmin yaşda oyunçu artıq əsas millidə oynamalıdır. Əlavə U-23 yığmasına ehtiyac yoxdur. Bu, bizim sistemimizə də uyğun gəlmir. Premyer Liqada klublarla bağlı da limit var. U-23-ün yaradılması artıq gündəmdə deyil”.
Sportinfo.az-ın məlumatına görə, Elxan Məmmədov bu qərarı Rəşad Sadıqovun "CBC Sport”da yayımlanan “Bizim futbol” verilişində etdiyi çıxışdan sonra verib.
“Qarabağ”ın kapitanı U-23 millisinin yaradılması ideyasını tənqid edib: “Bu saatlarla müzakirə olunan məsələdir. Kobud olsa da, deməliyəm ki, mənasız qərardır. Çünki futbolçu sayımız azdır və orada kim çıxış edəcək? U-20 millisini yaratmaq daha yaxşıdır”.
Federasiyadan redaksiyamıza daxil olan xəbərə görə, E.Məmmədov R.Sadıqovu dinlədikdən sonra Məşqçilər Komitəsinin üzvləriylə görüşüb və onları tənqid edib:
”Biz sizdən ciddi təkliflər gözləyirik. Bir də belə mənasız-mənasız ideyalarla mənim üstümə gəlməyin. Hansısa təklif irəli sürməmişdən əvvəl bu barədə yaxşı-yaxşı düşünün”.