Heç kimin vəkili deyiləm. Amma haqsızlığa biganə qalmaq olmur. 28 nəfəri futboldan sildik, bu, nəyisə dəyişəcəkmi? Elədisə, “Rəvan”ın, “Şərurspor”un çempionatdan qovulması, “Bakılı”, “Göyəzən”, “Energetik”in dağıdılması niyə dəyişmədi? O klublar getdi, “Turan Tovuz”, “Ağsu” ortaya çıxdı, bu futbolçuların da yerini başqaları alacaq. Problem fərdlərdə deyil.

***

Siz canınız, kimi aldadırsız, kimin gözündən pərdə asırsız? Axı, addımlarınız göstərir ki, məkrlisiz, məqsədlisiz. Çox bəsit addımlar atırsız. Qazanda nə bişdiyini görmək üçün qapağını qaldırıb baxmağa ehtiyac yoxdu, qoxusundan hər şey bəlli olur.

***

AFFA dünən 28 nəfəri futboldan “sildi”. Rəsmi qərarda da göstərildi ki: “...Birinci divizionda çıxış edən “Ağsu”, “Turan Tovuz” və “Zirə-2” futbol klublarının bir neçə oyununda qeydə alınmış şübhəli məqamlarla əlaqədar AFFA-nın nəzdində fəaliyyət göstərən danışılmış oyunlarla bağlı xüsusi komissiyanın və ekspertlərin apardığı araşdırmaya, həmçinin UEFA-dan AFFA-ya daxil olan məlumatlara əsasən, klubların adları göstərilən futbolçularının, futbol funksionerlərinin, o cümlədən futbolda hər hansı fəaliyyəti olmayan şəxslərin nəticəsi manipulyasiya olunmuş oyunlarda iştirakı müəyyən olunub...”

Çox gözəl. Həqiqətən alqışlanası addımdı. Bu insanların günahını sübut etdikdən sonra onları nəinki futboldan silmək, bəlkə ümumiyyətlə, cəmiyyətdən təcrid etmək lazımdı. Pis örnəkdilər, gənclərimizin gələcəyini məhv edirlər, futbolun təməl prinsiplərini xəyanət edirlər. Və yalnız futbolçuları cəzalandırmaqla kifayətlənmək olmaz, bu, böyük şəbəkədi, onların gedib çıxdığı ən son nöqtəni tapmaq, virusun kökünü kəsmək lazımdı. “Məhsul”u tapıb yandırmaqla onun axırına çıxmaq olmaz, “fermer”ləri, “plantasiya”ları məhv etmək lazımdı.

***

Futbolçuları diskvalifikasiya etdiz, bəs, “Ağsu”nun, “Turan Tovuz”un taleyi ilə bağlı niyə qərar vermədiz? Yiyələrindən qorxursuz? Bu klubların faktiki meydana çıxmaq üçün heyəti qalmayıb, onları çempionatdan qovmaq buqədərmi çətindi? Niyə araşdırmaları 2 klubla kifayətləndirdiz? Axı, “Qaradağ Lökbatan” və MOİK futbolçuları da araşdırma obyektidi. Onları növbəti hədə dalğasına saxlayırsız? Yoxsa klanların davasında birinin digərinə verdiyi gözdağıdı, demək istəyirsiz ki, “ağıllanmasaz, yerimizə göz dikməyə davam etsəz”, sizi də eyni aqibət gözləyir?

Hər şey əladı, gözəldi, günahkarlar cəzalanır. Amma bunu niyə dekabrın 13-də, məhz İcraiyyə Komitəsinin iclası günü etdiz? Çünki...

...İcraiyyə Komitəsində Avro-2020-nin final mərhələsinə çıxa bilməməyin;

...Seçmə mərhələdə cəmi 1 xal toplamağın;

...Nikola Yurçeviç kimi sıradan birinə niyə 1 milyon avro verildiyinin, ümumiyyətlə, onun ölkəmizə niyə çağırıldığının;

...Bütün milli komandaların faciəvi çıxışının;

...Uşaq futbolundakı biabırçı durumun;

...Onlarca uğursuz layihənin;

...Dağıdılan milyonların;

...Və daha nələrin hesabatını verməli idiz. Siz isə baş aldatmaq üçün oyun alverinylə bağlı araşdırmaların nəticəsini məhz hesabat günündə açıqladız. Bəli, araşdırılmalı, günahkarlar cəzalanmalıdı. Amma niyyətinizi, məqsədinizi ucuz oyunlarla, ssenarilərlə ortaya qoyursuz. Gündəm dəyişməklə səbəbləri dəyişə bilməyəcəksiz.

***

Və sual: divizion klubları nəyə görə danışılmış oyunlara gedir, futbolçular niyə bu çirkaba bulaşır? Bu sualı özünüzə vermisizmi?

Cavabı deyim:

1. Premyer Liqaya vəsiqə qazanmaq şansı yox, düz-əməlli maaş yox, mükafat yox. Kəsəsi, futbolun ruhu olan mübarizə üçün stimul yoxdu. Heç kim 200-300 manatla ailə saxlaya, dolandıra bilməz. Belədə ehtiyac içində çabalayanlar asanca bukmekerlərin, işbazların toruna düşür, pis yolu seçir, özlərini də məhv edirlər, ətraflarını da.

2. Premyer Liqada cəmi 8 komanda var. Üzdə olan 30-40 yerli futbolçu və legionerlər bütün yerləri tutub. Kəsəsi, divizion klublarının üzvlərinin inkişaf etmək, yuxarı yüksəlmək imkanı yoxdu. Yaşamaq üçün rahat qazanc yolu tapmalıydılar. Komanda sayı çox olardı, onlar daha imkanlı klublarda oynayardı, normal maaş alardı və bu yola düşməzdilər.

3. Başqa sahədə işləmək perspektivi yoxdu, bu insanlar uşaqlıqdan ömürlərini futbola bağlayıblar. Əvvəla, başqa iş yoxdu, varsa da bunlarlıq deyil. Hamı Qara Qarayev, Maksim Medvedev, Emin Mahmudov olası deyil, ikinci, üçüncü dərəcəli futbolçular da olmalıdı. Və onlara uyğun komandalar olmalı, bu futbolçular orada oynamalıdılar.

4. Bu uşaqları özümüz cinayətkar kimi yetişdirmişik. Bəlkə də əksəriyyətinin istedadı olub, amma uşaq məktəblərində top oyununun sirrlərini öyrənə bilməyiblər, çünki məktəblərimiz bərbad gündədi, məşqçi-pedaqoqlarımız yoxdu. Beləcə elə uşaq vaxtından şikəst ediliblər, yarıfabrikat kimi yetişiblər, bu yaşlarında başqa sənət tapmaları mümkün deyil. Ona görə də cinayətə məcbur olublar.

***

Qərar vermək asandı. Amma bu futbolçuları axı, özümüz cinayətkara çevirmişik. İndi də günahlarımız qumarbaz rolunda qarşımıza çıxır. Eddi İsrafilov, Renat Dadaşov, Dmitri Nazarov hərəsi 1-2 milyon dollar alıb minnətlə millimizin formasını geyir. Həmin pulları düzgün xərcləsəydik, sağlam nəslin yetişməsinə, inkişafına yönəltəsəydik, indi belə olmazdı axı.

***

AFFA-nın baş katibi Elxan Məmmədov 3 ildi bu virusla mübarizə apardıqlarını deyir. Doğrudu, çünki əvvəllər heç buna ehtiyac yox idi. O zaman Premyer Liqada daha çox komanda oynayırdı, hamının oynaması üçün şərait vardı; futbolçular sovet futbol məktəbinin yetirməsiydi, yarıfabrikatlar deyildi. Və təbii ki, pis yola gedənlərin sayı çox az idi, belə cəzalara da ehtiyac qalmırdı.

Hörmətli AFFA rəhbərləri, bugünün cinayətkarları sizin qurduğunuz bərbad sistemin məhsullarıdı, onları siz yetişdirmisiz. 12 il öncə bünövrəni qoymusuz, yetişib, böyüyüb, sağalmaz yaraya çevriliblər. Və bu gün də onları siz bəsləyirsiz, məhz sizin məqsədsiz maliyyələşdirdiyiniz klublarda oynayırlar. Papağınızı qarşınıza qoyub, fikirləşin, əgər papaq qoyursuzsa (futbolinfo)...

VÜSAL MAHMUDOV