“Qarabağ”ın baş məşqçisi Qurban Qurbanov Bakıda Finlandiya HJK-inə 2:1 hesabı ilə qalib gəldikləri Avropa Liqasının 3-cü əsnifat mərhələsinin ilk oyununu şərh edib.
Sportinfo.az xəbər verir ki, 51 yaşlı mütəxəssis matçın gərgin keçdiyini bildirib:
“Ciddi rəqibə qarşı oynayırdıq. Hava çox isti idi. Futbolçular belə havada sona kimi dözdülər. Vacib qələbə idi. Azarkeşlərə təşəkkür edirəm”.
Təcrübəli çalışdırıcı futbolçularda gərginlik olduğunu gizlətməyib:
“Rəqibin zərbələrini saymadım. Əsas öz qol epizodlarımızdır. İstifadə edə bilmədiyimiz yüz faizlik fürsətlər var idi.
Futbolçuları başa düşürəm. İstər-istəməz gərginlik var idi.
Düşünürəm ki, cavab oyununda tam əksi olar, daha yaxşı oyun göstərib qol epizodlarından istifadə edərik”.
Pley-offa çıxmaq şanslarını dəyərləndirən baş məşqçisi cüzi üstünlük qazandıqlarını vurğulayıb:
“Hər qələbə futbolçulara inam verir. Top buraxandan sonra qol vurmaq vacib idi.
Rəqibin qolundan sonra futbolçular sına bilərdilər. Amma get-gedə oyunu ələ aldılar. Cavab oyunu öncəsi bir az üstünlüyümüz var”.
Qurbanov Konfrans Liqasının 3-cü təsnifat mərhələsinin ilk oyununda Bakıda Serbiya “Partizan”ına 2 cavabsız qolla qalib gələn “Sabah” komandasını da təbrik edib:
“İnanıram ki, cavab oyununda da yaxşı nəticə əldə edəcək, ölkəmizin reytinq xalını daha da yaxşılaşdıracaqlar”.